دنیا اس وقت ایک عجیب دو راہے پر کھڑی ہے, ایک طرف ترقی کی دوڑ ہے، رفتار ہے، معیشت کا دباؤ ہے اور دوسری طرف وہی ترقی زمین کے درجہ حرارت کو اس نہج پر لے آئی ہے جہاں موسم بھی اب خبر بن چکا ہے، بارشیں بے وقت، گرمی بے رحم اور سردی بے ترتیب ہو چکی ہے، ایسے میں جاپان کی ہائیڈروجن ٹرین HYBARI صرف ایک ٹرین نہیں، ایک سوچ ہے، ایک پیغام ہے کہ اگر انسان چاہے تو وہ اپنی غلطیوں کا ازالہ بھی خود کر سکتا ہے ۔
ہم نے ترقی کے نام پر ڈیزل جلایا، کوئلہ جلایا، فضا کو دھوئیں سے بھر دیا، ہم نے کبھی نہیں سوچا کہ یہ دھواں آخر کہاں جائے گا؟ وہی دھواں آج ہمارے سروں پر بادل بن کر منڈلا رہا ہے، لیکن یہ بارش کے بادل نہیں، یہ گرمی کے بادل ہیں، سائنس اسے Global Warming کہتی ہے اور ہم اسے بدلتا ہوا موسم کہتے ہیں ۔
یہاں جاپان نے ایک مختلف راستہ چنا، اس نے کہا کہ ٹرین چلے گی، لیکن دھواں نہیں نکلے گا، توانائی بنے گی، لیکن زمین کو نقصان نہیں ہوگا، یہی وہ مقام ہے جہاں Fuel Cell ٹیکنالوجی سامنے آتی ہے، ہائیڈروجن اور آکسیجن کو ملایا جاتا ہے، بجلی پیدا ہوتی ہے اور نتیجے میں صرف پانی کے بخارات خارج ہوتے ہیں، نہ شور، نہ دھواں، نہ زہر، یہ ایسا ہی ہے جیسے کوئی گاڑی ہو جو سانس بھی لے اور فضا کو صاف بھی کرے ۔
یہاں ایک دلچسپ سوال پیدا ہوتا ہے، اگر ٹرین سے پانی نکل رہا ہے تو کیا یہ بارش بڑھا دے گی؟ بظاہر سوال سادہ ہے لیکن اس کے پیچھے ایک خوف چھپا ہے، حقیقت یہ ہے کہ یہ بخارات اتنے کم ہوتے ہیں کہ فضا کے وسیع نظام میں ان کی کوئی خاص حیثیت نہیں ہوتی، اصل مسئلہ بخارات نہیں، وہ گیسیں ہیں جو ہم صدیوں سے چھوڑ رہے ہیں، جنہیں سائنس Greenhouse Gas کہتی ہے ۔ یہی گیسیں زمین کو ایک بند کمرے کی طرح گرم کر دیتی ہیں، اگر ہم ان کو کم کر دیں تو بارشیں خود بخود اپنے نظام پر واپس آنا شروع ہو جائیں گی ۔
پاکستان جیسے ممالک میں جہاں ہر نئی ٹیکنالوجی کو پہلے شک کی نظر سے دیکھا جاتا ہے، ایک اور سوال اٹھتا ہے کہ یہ ٹرین سردی میں کیسے چلے گی؟ اگر پانی جم گیا تو؟ لیکن یہ وہ سوال ہے جس کا جواب سائنس پہلے ہی دے چکی ہے۔ جدید ٹرینوں میں ہیٹنگ سسٹم موجود ہوتے ہیں، پائپوں کو گرم رکھا جاتا ہے اور ہائیڈروجن خود ایسی گیس ہے جو شدید سردی میں بھی اپنا کام جاری رکھتی ہے، یعنی جہاں ڈیزل ہار مان لیتا ہے، وہاں یہ ٹیکنالوجی کھڑی رہتی ہے ۔
پاکستان اور بھارت جیسے ممالک کے پاس دنیا کے بڑے ریلوے نیٹ ورکس ہیں، لیکن ان میں سے زیادہ تر آج بھی ڈیزل پر چل رہے ہیں، ہم ہر سال اربوں روپے کا ایندھن جلاتے ہیں، شہروں کو دھوئیں سے بھرتے ہیں اور پھر ہسپتالوں میں سانس کے مریضوں کی تعداد پر حیران ہوتے ہیں، اگر ہم چاہیں تو بغیر پورا نظام بدلے، صرف انجن بدل کر ایک بڑی تبدیلی لا سکتے ہیں، نہ ہمیں ہر جگہ بجلی کی تاریں بچھانی ہوں گی، نہ بھاری سرمایہ کاری کرنی ہوگی، چند ہائیڈروجن سٹیشنز اور ایک واضح پالیسی، اور کھیل بدل سکتا ہے ۔
دنیا میں تبدیلی ہمیشہ خاموشی سے آتی ہے، نہ اس کے شور ہوتے ہیں، نہ نعرے، جیسے موبائل فون آیا اور سب کچھ بدل گیا، جیسے انٹرنیٹ آیا اور دنیا سمٹ گئی، ویسے ہی ہائیڈروجن ٹرین بھی آہستہ آہستہ ہمارے نظام کا حصہ بن جائے گی، سوال صرف یہ ہے کہ ہم اس تبدیلی کا حصہ بنیں گے یا ہمیشہ کی طرح دیر سے جاگیں گے ۔
ہمیں یہ سمجھنا ہوگا کہ موسمیاتی تبدیلی کوئی آنے والا خطرہ نہیں، یہ دروازہ کھٹکھٹا رہی ہے، اور ہائیڈروجن ٹیکنالوجی اس دروازے پر کھڑی ایک امید ہے، ایک ایسا راستہ جہاں ترقی بھی ہے اور تحفظ بھی، جہاں رفتار بھی ہے اور ذمہ داری بھی ۔
فیصلہ ہمارے ہاتھ میں ہے، ہم دھوئیں کے ساتھ جینا چاہتے ہیں یا بھاپ کے ساتھ۔ !
