ضلع بنوں میں دہشت گردوں کے دو مختلف مقامات پر حملے پولیس کی بروقت اور مؤثر جوابی کارروائی کے باعث ناکام بنا دیے گئے۔
پولیس کے مطابق دہشت گردوں نے تھانہ بکا خیل اور چوکی فتح خیل کو نشانہ بنایا، جہاں شدید فائرنگ کا تبادلہ ہوا۔ تھانہ بکا خیل میں تقریباً 45 منٹ جبکہ چوکی فتح خیل میں ایک گھنٹے تک جھڑپ جاری رہی۔
اہلکاروں کی فوری اور بھرپور جوابی کارروائی کے نتیجے میں حملہ آور پسپا ہونے پر مجبور ہو گئے۔ پولیس حکام کے مطابق مقابلے کے دوران ایک دہشت گرد ہلاک ہو گیا جبکہ متعدد کے زخمی ہونے کا خدشہ ظاہر کیا جا رہا ہے۔
پولیس نے ہلاک دہشت گرد کے قبضے سے کلاشنکوف، ہینڈ گرنیڈ اور واکی ٹاکی بھی برآمد کر لی ہیں، جو اس حملے کی منصوبہ بندی اور شدت کو ظاہر کرتی ہیں۔
واقعے کے بعد علاقے میں پولیس اور سکیورٹی فورسز نے مشترکہ طور پر سرچ اور کلیئرنس آپریشن شروع کر دیا ہے تاکہ کسی بھی ممکنہ خطرے کو مکمل طور پر ختم کیا جا سکے۔
ڈپٹی انسپکٹر جنرل سجاد خان نے پولیس کی بروقت کارروائی کو سراہتے ہوئے کہا کہ اہلکاروں نے بہادری اور پیشہ ورانہ مہارت کا مظاہرہ کیا۔
دوسری جانب انسپکٹر جنرل پولیس خیبرپختونخوا نے بھی پولیس اہلکاروں کی کارکردگی کو سراہتے ہوئے ان کے لیے نقد انعامات اور تعریفی اسناد کا اعلان کیا ہے۔ حکام کے مطابق پولیس نے دہشت گردوں کے مذموم عزائم ناکام بنا کر ایک بڑی تباہی کو ٹال دیا۔
