وفاقی دارالحکومت اسلام آباد، راولپنڈی اور خیبرپختونخوا سمیت ملک کے مختلف علاقوں میں بارش کے باعث موسم خوشگوار ہو گیا جبکہ سردی کی شدت میں اضافہ دیکھنے میں آیا ہے۔
ذرائع کے مطابق گزشتہ رات سے ملک کے بیشتر علاقوں میں وقفے وقفے سے بارش کا سلسلہ جاری ہے۔ اسلام آباد اور راولپنڈی کے علاوہ ڈیرہ اسماعیل خان، خیبر، چارسدہ اور مردان میں بھی بارش کے ساتھ ٹھنڈ میں اضافہ ہوا ہے۔
کئی مقامات پر بارش کا پانی سڑکوں پر جمع ہو گیا جس کے باعث شہریوں کو آمدورفت میں مشکلات کا سامنا ہے۔ دوسری جانب کوئٹہ سمیت بلوچستان کے مختلف علاقوں میں تیز بارش اور ژالہ باری بھی ہوئی، جس سے موسم مزید سرد ہو گیا ہے۔
محکمہ موسمیات کے مطابق آئندہ چوبیس گھنٹوں کے دوران اسلام آباد، راولپنڈی، مری، گلیات، جہلم اور دیگر علاقوں میں مزید تیز بارش اور تیز ہواؤں کا امکان ہے۔ جبکہ آزاد کشمیر اور گلگت بلتستان کے مختلف علاقوں میں برفباری کی پیشگوئی بھی کی گئی ہے۔
حکام کا کہنا ہے کہ بارشوں کا یہ سلسلہ بیس مارچ تک جاری رہنے کی توقع ہے۔ قومی ادارہ برائے انسدادِ آفات نے تمام متعلقہ اداروں کو الرٹ رہنے اور کسی بھی ہنگامی صورتحال سے نمٹنے کے لیے تیار رہنے کی ہدایت جاری کر دی ہے۔
دوسری جانب کسانوں نے حالیہ بارشوں کو خوش آئند قرار دیتے ہوئے کہا ہے کہ یہ بارش گندم اور دیگر فصلوں کے لیے نہایت مفید ثابت ہو گی۔
