ایران سے ہزاروں پاکستانی شہری واپس وطن پہنچ گئے ہیں اور بلوچستان کے گوادر اور چاغی سرحدی راستوں کے ذریعے پاکستان میں داخل ہوئے ہیں۔
وزیر اعلیٰ بلوچستان سرفراز بگٹی نے بتایا کہ فبروری کی 28 تاریخ سے گزشتہ رات تک 5615 پاکستانی شہری ایران سے واپس پاکستان پہنچ چکے ہیں۔ ان کے ساتھ ایرانی ڈرائیورز سمیت 453 دیگر غیر ملکی شہری بھی ملک میں داخل ہوئے ہیں۔
سرفراز بگٹی نے کہا کہ گوادر اور چاغی کی ضلعی انتظامیہ نے آنے والے مسافروں کے لیے تمام سہولیات فراہم کیں اور ان کی اچھی دیکھ بھال کی گئی۔ انہوں نے مزید کہا کہ سرحدی کراسنگ پوائنٹس پر مسافروں کی سہولت، سلامتی اور آرام کے لیے تمام ادارے مکمل طور پر تیار اور چوکس ہیں۔
بلوچستان حکومت کی جانب سے واپسی کرنے والے پاکستانیوں کے لیے سفری سہولیات اور حفاظتی انتظامات یقینی بنائے گئے ہیں تاکہ یہ عمل بغیر کسی مشکل کے مکمل ہو سکے۔
