ہیملٹن میں کھیلے گئے دوسرے ون ڈے میچ میں پاکستان نے ٹاس جیت کر میزبان ٹیم کو بیٹنگ کی دعوت دی، نیوزی لینڈ نے293 رنز بنائے، جس کے تعاقب میں قومی ٹیم 42 ویں اوور میں 208 رنز بناکر آوٹ ہوئی ۔
کیوی اوپنرز نے ٹیم کو 54 رنز کا آغاز فراہم کیا جس کے بعد وقفے وقفے سے وکٹیں گرتی رہیں، تاہم ساتویں نمبر پر بیٹنگ کے لیے آنے والے مچل ہے 78 گیندوں پر 99 رنز کی ناقابل شکست اننگز کھیلی ۔
پاکستانی نژاد محمد عباس 41 رنز بنا کر دوسرے نمایاں بلے باز رہے، ریس ماریو 18، نِک کیلی 31، ہنری نکولس 22، ڈیرل مچل 18، کپتان مائیکل بریس ویل 17، نیتھن اسمتھ 8 اور بین سیئرز 6 رنز بنا کر آؤٹ ہوئے ۔
پاکستان کے محمد وسیم اور سفیان مقیم نے 2، 2، فہیم اشرف، عاکف جاوید اور حارث رؤف نے ایک، ایک کھلاڑی کو آؤٹ کیا ۔
میزبان ٹیم کے مقررہ ہدف کے تعاقب میں قومی ٹیم 42 ویں اوور میں ہمت ہار گئی اور دوسرے میچ میں بھی شکست کا سامنا کرنا پڑا ، پاکستان کی جانب سے فہیم اشرف نے سب سے زیادہ 73 جبکہ فاسٹ باولر نسیم شاہ نے 51 رنز کی اننگز کھیلی ۔
پاکستان کے سات کھلاڑی ڈبل فگر میں داخل بھی نہ ہوسکے،عبداللہ شفیق اور بابراعظم ایک، ایک، امام الحق 3، کپتان محمد رضوان 5 اور سلمان آغاز 9 رنز بنا کر آؤٹ ہوئے ۔
حارث رؤف کے 3 رنز پر ریٹائرڈ ہرٹ ہونے کے بعد ان کی جگہ بلے بازی کرنے والے نسیم شاہ نے دیدہ دلیری سے بلے بازی کی اور پاکستان کو 200 رنز عبور کرنے میں اہم کردار ادا کرتے ہوئے 51 رنز کی شاندار باری کھیلی ۔
پاکستان کی پوری ٹیم 42ویں اوور میں 208 رنز بنا کر آؤٹ ہوگئی اور کیوی ٹیم نے مسلسل دوسرا میچ جیت لیا ۔
مخالف ٹیم کے بین سیئرز نے شاندار باؤلنگ کا مظاہر کرتے ہوئے 5 شکار کیے جبکہ جیکب ڈفی 3، وِل اورورکے اور نیتھن سمتھ نے ایک، ایک وکٹ اپنے نام کی ۔
اس میچ میں فتح کے ساتھ نیوزی لینڈ نے تین میچوں کی سیریز میں دو صفر کی فیصلہ کن برتری حاصل کرلی ہے ، سیریز کا تیسرا اور آخری میچ 5 اپریل کو کھیلا جائے گا ۔
