27 فروری 2019 و ہ دن ہے جب پاک فضائیہ کے شاہینوں نے فضائی جنگی تاریخ کا مختصر ترین اور فیصلہ کن معرکہ سر کیا۔
تفصیلات کے مطابق 27 فروری 2019 کا ’آپریشن سویفٹ ریٹارٹ بھارت اپنی پوری زندگی نہیں بھول پائے گا، اس دن پاک فضائیہ کے شاہینوں نے فضائی جنگی تاریخ کا مختصر ترین اور فیصلہ کن معرکہ سر کیا، پاکستان نے جنگی قیدی ابھینندن ورتمان کو چائے پلائی تو وہ کہہ اٹھا’’دا ٹی اس فینٹیسٹک‘‘۔
2019 کا سال جس کے آغاز سے مودی سرکار نے کشیدگی بڑھانے کیلئے ایل او سی پر بلااشتعال کارروائیاں تیز کررکھی تھیں لیکن ہر بار منہ کی کھائی ، کچھ نہ بن پڑا تو پلوامہ ڈرامہ رچا لیا ، جہاں 14 فروری کو دہشتگرد حملہ کروا کے اپنی سینٹرل ریزرو پولیس فورس کے 40 اہلکاروں کو خون میں نہلا دیا ۔
سازش کے مطابق مودی نے الزام تو پاکستان پر دھر دیا لیکن شواہد کوئی نہ دے سکا ، الٹا پاکستان سے 350 کلو گرام بارودی مواد پلوامہ اسمگل ہونے کا ڈھنڈورا پیٹ کر چپے چپے پر کھڑی اپنی ہی 8 لاکھ فوج کے منہ پر طمانچہ دے مارا ۔
سبکی چھپانے کیلئے سرجیکل اسٹرائیک کا واویلا شروع کیا ، 26 فروری کی رات تاریکی میں چھپ کر بالا کوٹ کے گاؤں جابہ پر وار کردیا اور شور مچایا کہ حملے میں 350 پاکستانی مار ڈالے مگر ثبوت سامنے آیا صرف ایک کوے کی ہلاکت اور چند درختوں کی تباہی کا ، لیکن بھارتی دراندازی کی یہ حماقت پاکستان معاف نہیں کرسکتا تھا ۔
پاک فوج نے واضح اعلان کیا کہ پاکستان آرمی سرپرائز دے گی لیکن وقت اور جگہ کا انتخاب ہم خود کریں گے ، چند ہی گھنٹے بعد چڑھتے سورج میں صبح 10 بجے پاکستان نے بھارت کے 2 لڑاکا طیارے مار گرائے ، اس وقت سماہنی سیکٹر میں موجود سما ءکی ٹیم نے یہ تاریخی مناظر ناقابل تردید ثبوت کے طور پر محفوظ کرلیے ۔
ایک بھارتی طیارہ مقبوضہ کشمیر میں اور دوسرا آزاد کشمیر کے گاؤں سندھاڑ میں گرا ، پیراشوٹ کے ذریعے جان بچا کر قریبی گاؤں ہوڑاں میں گرنے والے بھارتی پائلٹ ابھینندن کو پاک فوج نے مقامی لوگوں کے غیظ و غضب سے بچایا اور اس جنگی قیدی کو مہمان بنایا ۔ بھمبر کے اے کے 4 بریگیڈ میں وہ چائے پلائی جس کی چسکیوں کی گونج بھارت کبھی نہیں بھول پائےگا۔
امن پسند پاکستان نے جذبہ خیر سگالی کے تحت جنگی قیدی ابھینندن کو تو 60 گھنٹے میں ہی آزاد کردیا لیکن احمقانہ مہم جوئی کرنے والی مودی سرکار کو پاک فوج اور سما نے کہیں منہ دکھانے کے لائق بھی نہ چھوڑا ۔
آپریشن سوئفٹ ریٹارٹ کے 6 سال مکمل ہونے پر چیئرمین جوائنٹ چیفس آف سٹاف، سروسز چیفس نے مسلح افواج کو خراج تحسین پیش کیا۔
پاک فوج کے شعبہ تعلقات عامہ (آئی ایس پی آر) کے مطابق عسکری قیادت نے مسلح افواج کے غیرمتزلزل حوصلے، پروفیشنلزم، قربانیوں کو سراہا، آپریشن سوئفٹ ریٹارٹ بھارت کی بلا جواز جارحیت کے خلاف ایک مضبوط اور محتاط جواب تھا۔
آئی ایس پی آر کے مطابق آپریشن نے پاکستان کے اپنی خود مختاری اور علاقائی سالمیت کے تحفظ کے عزم کو ایک بار پھر ثابت کیا، آپریشن نے پاکستان کی مسلح افواج کی آپریشنل مہارت اور تیاری کو اجاگر کیا، جارحیت کو مؤثر طریقے سے روکنے اور فوری جواب کی صلاحیت کا مظاہرہ بھی ہوا۔
پاک فوج کے شعبہ تعلقات عامہ نے کہا کہ پورے معرکے کے دوران مکمل آپریشنل غلبہ برقرار رکھا گیا، عسکری قیادت نے پاکستان کی قومی سلامتی اور استحکام کو یقینی بنانے کیلئے اپنے پختہ عزم کا اعادہ کیا، علاقائی امن کے قیام کیلئے جاری کوششوں کو مزید فروغ دینے کی اہمیت پر زور دیا۔
