پی ڈی ایم اے نے خیبرپختونخوا کے بیشتر اضلاع میں آج سے 5 جون تک تیز ہواؤں اور گرج چمک کے ساتھ وقفے وقفے سے بارشوں کی پیشگوئی کرتے ہوئے تمام ضلعی انتظامیہ کو الرٹ جاری کر دیا ہے۔
پی ڈی ایم اے کے مطابق چترال، دیر، سوات، شانگلہ، مالاکنڈ، کوہستان، بونیر، مانسہرہ، ایبٹ آباد، ہری پور، بٹگرام، پشاور، مردان، نوشہرہ، چارسدہ، صوابی، کرم، اورکزئی، خیبر، مہمند اور باجوڑ میں بارشوں کا امکان ہے۔
ادارے نے خبردار کیا ہے کہ شدید بارشوں کے باعث مقامی ندی نالوں میں طغیانی آسکتی ہے جبکہ بالائی اضلاع میں لینڈ سلائیڈنگ اور فلیش فلڈنگ کا خطرہ بھی موجود ہے۔ عوام کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔
دوسری جانب پی ڈی ایم اے نے سوات، چترال، دیر، کوہستان اور مانسہرہ میں گلیشیائی جھیل پھٹنےکا الرٹ بھی جاری کیا ہے۔ ادارے کے مطابق شدید گرمی کے باعث گلیشیئرز تیزی سے پگھل رہے ہیں جبکہ 4 جون سے متوقع بارشوں کا سلسلہ خطرات میں مزید اضافے کا سبب بن سکتا ہے۔
پی ڈی ایم اے نے خدشہ ظاہر کیا ہے کہ حساس علاقوں کے ندی نالوں میں اچانک طغیانی آسکتی ہے، جس کے پیش نظر مقامی انتظامیہ کو پیشگی حفاظتی اقدامات یقینی بنانے اور متعلقہ اداروں کو ہنگامی صورتحال سے نمٹنے کے لیے الرٹ رہنے کی ہدایت جاری کی گئی ہے۔
