امن جرگے کی کامیاب کوششوں کے بعد چار سیکیورٹی اہلکار رہا ہوگئے۔ پولیس ذرائع کے مطابق رہائی پانے والے اہلکار گزشتہ سات ماہ سے کالعدم تحریک طالبان پاکستان (ٹی ٹی پی) کی حراست میں تھے۔
ٹانک: پولیس کے مطابق رہا ہونے والوں میں پولیس، فیڈرل کانسٹیبلری اور فرنٹیئر کور کے اہلکار شامل ہیں۔ چاروں اہلکار ضلع ٹانک کے کنڈی سرکل سے تعلق رکھتے ہیں۔
رہائی کے موقع پر کنڈی سرکل امن جرگے کے مشر قیوم خان کنڈی نے باضابطہ بیان جاری کیا اور ویڈیو کلپ کے ذریعے اس خوش آئند خبر کی تصدیق کی۔
پولیس نے اس موقع پر کہا کہ امن جرگے کی ثالثی اور کوششوں نے اہلکاروں کی جان بخشی میں اہم کردار ادا کیا۔
ذرائع کے مطابق اہلکاروں کی صحت ٹھیک ہے اور انہیں ابتدائی طبی جانچ کے بعد اپنے اہل خانہ کے حوالے کر دیا گیا ہے۔
پولیس نے عوام سے اپیل کی ہے کہ وہ امن و امان کے قیام میں تعاون جاری رکھیں اور ایسے معاملات میں صرف اہلکاروں اور قانون نافذ کرنے والے اداروں پر بھروسہ کریں۔
