اعلیٰ سیاسی و عسکری قیادت نے بھارتی جارحیت کا تفصیلی جائزہ لیتے ہوئے بھارتی جارحیت اور اشتعال انگیزی پر بھرپور جوابی کارروائیاں جاری رکھنے کا فیصلہ کیا ہے اور اعلان کیا ہے کہ بھارتی جارحیت میں شہید ہونے والے پاکستانیوں کے خون کے ایک ایک قطرے کا بدلہ لیا جائے گا ۔
اسلام آباد: وزیراعظم شہبازشریف کی زیر صدارت پی ایم ہاؤس میں اعلیٰ سطح کا اہم اجلاس جس میں اعلیٰ سول اور عسکری قیادت نے شرکت کی ،اجلاس میں بھارتی جارحیت کا تفصیلی جائزہ لیا گیا جبکہ سیکیورٹی حکام کی جانب سے اجلاس کے شرکا کو بریفنگ دی گئی ۔
اجلاس میں بھارتی جارحیت اور اشتعال انگیزی پر بھرپور جوابی کارروائیاں جاری رکھنے کا فیصلہ کیا گیا، شرکا کو ڈرون حملوں اور پاکستانی ردعمل سے بھی آگاہ کیا گی ۔
پاکستانی قیادت نے بھارتی حملوں کا منہ توڑ جواب دینے کے عزم کا اظہار کیا، بریفنگ میں بتایا گیا کہ بھارت کے 25 اسرائیلی ڈرون مار گرائے گئے ۔
فورم نے اس عزم کا اظہار کیا کہ ڈرون حملوں میں شہید ہونے والوں کا بدلہ لیا جائے گا، ایک ایک پاکستانی کے خون کا حساب لیا جائے گا ۔
اس موقع پر وزیر اعظم نے کہا کہ پوری قوم پاک فوج کے ساتھ شانہ بشانہ کھڑی ہے، ہمیں اپنی پاک فوج پر فخر ہے اور ہم ہر حالات کے لیے تیار ہیں، پاکستان نے بھارت کے ڈرون اور جہاز مار گرائے ہیں ۔
شہباز شریف نے مزید کہا کہ پاکستان اپنے وقار اور عزت سے امن کے لیے پر عزم ہے، پاک افواج دشمن کےعزائم ناکام بنانے کی صلاحیت رکھتی ہے، دشمن کو خود ارادیت، علاقائی سالمیت پر حملے اور سلامتی کی خلاف ورزی کا جواب ملے گا ۔
