وزیرِ اعظم محمد شہباز شریف کا خصوصی دورہ کوئٹہ، وزیرِ اعظم محمد شہباز شریف نے سی ایم ایچ کوئٹہ بھی گئے اور قلات و بلوچستان کے دیگر اضلاع میں دہشتگردوں سے بہادری سے لڑتے ہوئے زخمی ہونے والے سیکیورٹی فورسز کے اہلکاروں کی عیادت کی ۔
وزیرِ اعظم نے زخمیوں سے گفتگو کے دوران انکے ملک کی خاطر قربانی کے جذبے اور وطن کی حفاظت کے غیر متزلزل عزم کی تعریف کی ، انہوں نے زخمیوں کو مخاطب کرتے ہوئے کہا کہ آپ سب قوم کے ہیروز ہیں ۔
وزیراعظم نے کہا کہ مجھ سمیت پوری قوم کو آپ اور قربانی کے جذبے سے سرشار آپ کے اہل خانہ پر فخر ہے،جب تک قوم کا تحفظ ایسے بہادر جوانوں کے سپرد ہے، دشمن پاکستان کی طرف میلی آنکھ سے نہیں دیکھ سکتا ۔
انہوں نے کہا کہ دہشتگردی کے ناسور کے ملک سے مکمل خاتمے کیلئے افواج پاکستان اور پاکستانی عوام شانہ بشانہ کھڑے ہیں. بلوچستان میں دہشت و شر کی فضاء پھیلانے والے عناصر بلوچستان کی ترقی کے دشمن ہیں ۔
وزیراعظم کا کہنا تھا کہ بلوچستان کے عوام کے تحفظ کیلئے سیکیورٹی فورسز شر پسند عناصر کے سد باب کیلئے دن رات مصروف عمل ہیں،بلوچستان کے امن، ترقی اور خوشحالی کے دشمنوں کے ناپاک عزائم کبھی کامیاب نہ ہونے دیں گے ۔
اس موقع پر زخمی جوانوں نے بھی وزیرِ اعظم سے گفتگو کی ،وزیرِ اعظم نے جوانوں کی بہادری اور ہمت پر انہیں خراج تحسین پیش کیا ۔
نائب وزیرِ اعظم و وزیرِ خارجہ اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور وزیرِ توانائی اویس لغاری بھی وزیرِ اعظم کے ہمراہ تھے ۔
