پشاور: نگران وزیراعظم انوار الحق کاکڑ نے کہا ہےکہ دہستگردوں میں حیا اور جرات ہے تو سامنے آکر لڑیں، بزدل بے غیرت ہیں جو چھپ کر حملے کرتے ہیں اگر ان میں حیا اور جرات ہے تو بلوں سے نکلیں سامنے آکر لڑیں، یہ 10 حملے کریں گے ہم ہزار بار جواب دیں گے۔
نگران وزیراعظم نے پشاور میں پولیس دربار سے خطاب میں کہا کہ مجھے بڑی خوشی ہورہی ہے کہ صفت غیور اور ملک سعد جیسی ہستیوں کے ورثا میرے سامنے بیٹھے ہیں، بسا اوقات ہم آپ کو مالی وسائل اس طریقے سے مہیا نہیں کرپاتے جو کرنے چاہئیں، بدقسمتی سے جو احترام اور مقام کا آپ کا حق ہے وہ ادا نہیں کرپاتے، یہ آپ کا ہم پر قرض ہے۔
انہوں نے کہا کہ دہشتگرد گرے ہوئے لوگ ہیں، اس شہر میں انہوں نے بچے قتل کیے،ان بے غیرتوں کو حیا آنی چاہیے، ہم ان سے نہیں ڈرتے، میں نے مر جانا ہے خودکش حملے میں بھی مارے جانا ہے، کسی کا باپ اس کے بغیر نہیں کرسکتا، ہم ان کو علیٰ الاعلان کہتے ہیں یہ 10 حملے کریں گے ہم ہزار بار جواب دیں گے، یہ دین کے نام پر کس کو ڈراتے ہیں، زندگی اور موت کا فیصلہ اللہ کے ہاتھ میں ہے۔ وزیراعظم نے کہا کہ خودکش حملہ آور ہمیں ڈرانا چاہتے ہیں لیکن ہم حکمت اور ہمت سے یہ لڑائی لڑیں گے۔
