اسلام آباد، راولپنڈی اور خیبر پختونخوا سمیت ملک کے مختلف علاقوں میں بارش کے باعث موسم خوشگوار اور سرد ہو گیا ہے۔ محکمہ موسمیات کے مطابق آج بھی کئی علاقوں میں مزید بارش کا امکان ہے۔
گزشتہ روز سے اسلام آباد اور راولپنڈی سمیت ملک کے بیشتر حصوں میں بارش کا سلسلہ جاری ہے، جبکہ بعض نشیبی علاقوں میں سڑکوں پر پانی جمع ہو گیا۔
دوسری جانب بلوچستان کے مختلف علاقوں خصوصاً کوئٹہ میں تیز بارش اور ژالہ باری بھی ہوئی، جس سے سردی کی شدت میں اضافہ ہوا ہے۔
محکمہ موسمیات نے آئندہ 24 گھنٹوں کے دوران خیبر پختونخوا کے مختلف اضلاع میں بارش، ژالہ باری اور پہاڑی علاقوں میں برفباری کی پیشگوئی کی ہے۔ جن علاقوں میں بارش متوقع ہے ان میں چترال، دیر، سوات، شانگلہ، کوهستان، بونیر، بٹگرام، مانسہرہ، باجوڑ، ایبٹ آباد، مہمند اور خیبر شامل ہیں۔
اس کے علاوہ اسلام آباد، راولپنڈی، مری، گلیات اور جہلم میں تیز بارش اور آندھی چلنے کا بھی امکان ظاہر کیا گیا ہے۔
محکمہ موسمیات کے مطابق بارشوں کا یہ سلسلہ 20 مارچ تک جاری رہنے کی توقع ہے، جس کے باعث درجہ حرارت میں مزید کمی آئے گی۔
