خیبرپختونخوا کےمختلف اضلاع میں فائرنگ کے واقعات پیش آئے جس کے نتیجے میں مجموعی طور پر مطلوب ملزم سمیت 5افراد جاں بحق ہوئے۔
ضلع نوشہرہ کے علاقے خیرآباد کنڈ میں فائرنگ کا واقعہ پیش آیا، پولیس کے مطابق واقعے میں 2 افراد جاں بحق ہو گئے۔ جاں بحق افراد کی شناخت مفتاح الدین اور خان محمد کے ناموں سے ہوئی۔ پولیس کے مطابق خان محمد مفتاح الدین کے ہاں مہمان تھا ، دونوں کو نامعلوم ملزمان نے فائرنگ کر کے قتل کردیا۔ ملزمان واقعے کے بعد فرار ہونے میں کامیاب ہو گئے۔
صوابی تھانہ یارحسین کی حدود میں مستورات تنازعہ پر بھی فائرنگ کا واقعہ پیش آیا جس کے نتیجے میں 2 نوجوان قتل کر دیئے گئے۔ جاں بحق ہونے والوں میں جلال اور عدنان شامل ہیں اور دونوں کی عمریں 22، 22 سال بتائی گئی ہیں۔
پولیس کے مطابق ملزمان نے مقتولین کو خالی گھر بلا کر ان پر فائرنگ کر دی، واقعے کا ایف ائی آر تھانہ یارحسین میں مقتول جلال کے بھائی کی مدعیت میں درج کر لیا گیا۔
دوسری جانب ضلع لکی مروت کے علاقہ زنگی خیل میں پولیس چھاپے کے دوران سابق ریکارڈ یافتہ ملزم ارشاد علی کو مارا گیا، ملزم کئی وارداتوں میں پولیس کو مطلوب تھا۔
