وفاقی وزیر خزانہ محمد اورنگزیب نے واشنگٹن میں عالمی مالیاتی فنڈ کی منیجنگ ڈائریکٹر کرسٹالینا جارجیوا سے اہم ملاقات کی۔ ملاقات میں وزیر خزانہ نے اسٹاف لیول معاہدے کے تحت پاکستان کے لیے کیے گئے نئے مالیاتی انتظامات پر شکریہ ادا کیا اور اصلاحاتی عمل کو تسلسل کے ساتھ جاری رکھنے کی یقین دہانی کرائی۔
وزیر خزانہ نے ایم ڈی آئی ایم ایف کو پاکستان کے دورے کی دعوت بھی دی تاکہ وہ خود پاکستان کی معاشی بہتری کا مشاہدہ کر سکیں۔
علاوہ ازیں، وزیر خزانہ نے عالمی بینک اور آئی ایم ایف کے سالانہ ”بہار اجلاس 2025“ میں شرکت کی، جہاں انہوں نے عالمی بینک گروپ کے صدر کا شکریہ ادا کیا اور پاکستان میں حاصل کی گئی میکرو اکنامک بہتری پر تفصیلی بریفنگ دی۔
واشنگٹن ہی میں وزیر خزانہ کی امریکی کاروباری شخصیات سے بھی ملاقات ہوئی، جو پاکستان بزنس کونسل اور یو ایس چیمبر آف کامرس کے تعاون سے منعقد ہوئی۔ وزیر خزانہ نے شرکاء کو پاکستان کے بہتر ہوتے معاشی اشاریوں سے آگاہ کیا اور کہا کہ سرمایہ کاری کے لیے پاکستان ایک ابھرتی ہوئی مثبت منزل بن رہا ہے۔
معدنیات کے شعبے میں پاک-امریکہ تعاون پر بھی گفتگو ہوئی، اور وزیر خزانہ نے اس میدان میں شراکت داری جاری رکھنے کی خواہش کا اظہار کیا۔ اس موقع پر امریکی محکمہ خزانہ کے اسسٹنٹ سیکرٹری، مسٹر رابرٹ کیپروتھ سے بھی وزیر خزانہ نے ملاقات کی، جس میں پاکستان کی معاشی صورتِ حال اور مستقبل کے لائحہ عمل پر تبادلہ خیال کیا گیا۔
