محنت ہی کامیابی کی کنجی ہے، نور زمان

پشاور: حالیہ انڈر 23 سکواش چیمپئن شپ میں فتح حاصل کرنے والے نور زمان نے پشاور میں میڈیا سے گفتگو کرتے ہوئے اپنی کامیابی پر اللہ کا شکر ادا کیا اور اس بات پر زور دیا کہ کھیل میں کامیابی صرف محنت کے ذریعے حاصل کی جا سکتی ہے۔

اپنی کامیابی کے بارے میں بات کرتے ہوئے نور زمان نے کہا، "میں اللہ کا بہت شکر گزار ہوں کہ اس نے مجھے پاکستان کا چیمپئن بنانے کا موقع دیا۔ یہ فتح ایک بڑا انعام ہے اور میں اس کامیابی کے لیے اللہ کا شکر ادا کرتا ہوں۔"

اگلے ٹورنامنٹس کے حوالے سے نور کا کہنا تھا، "میں اگلے چیمپئن شپ میں بھی اپنی بہترین کارکردگی دکھانے کی پوری کوشش کروں گا۔ میرا مقصد ہے کہ ہر میچ میں مزید بہتری لاؤں اور اپنے ملک کا نام روشن کروں۔"

نور زمان نے پاکستان سکواش فیڈریشن کا شکریہ ادا کرتے ہوئے کہا، "پاکستان سکواش فیڈریشن کا دل کی گہرائیوں سے شکریہ ادا کرتا ہوں جنہوں نے میری رہنمائی کی اور سکواش میں کامیابی کے لیے وسائل فراہم کیے۔"

اپنے خاندان کے بارے میں بات کرتے ہوئے نور نے کہا، "میرے خاندان میں اور بھی کئی سکواش چیمپئن ہیں جنہوں نے اس کھیل میں اپنی شناخت بنائی ہے۔ ان کی کامیابیاں مجھے ہمیشہ حوصلہ دیتی ہیں اور مجھے یہ فخر ہے کہ میں ان کے نقش قدم پر چل رہا ہوں۔”