ضلع کرم کی سرحدی پٹی بوڑکی اور خرلاچی کے علاقوں میں گزشتہ روز سرحد پار سے شدید فائرنگ اور گولہ باری کی اطلاعات موصول ہوئیں۔ مقامی ذرائع کے مطابق فائرنگ کے نتیجے میں ایک عام شہری جاں بحق ہوگیا، جس کے بعد علاقے میں خوف و ہراس پھیل گیا۔
سیکیورٹی ذرائع کا کہنا ہے کہ پاکستان فورسز نے بروقت اور مؤثر جوابی کارروائی کی، جس کے نتیجے میں حملہ آوروں کو بھاری جانی اور مالی نقصان اٹھانا پڑا۔ فائرنگ کا سلسلہ کئی گھنٹوں تک جاری رہا اور بھاری ہتھیاروں کے استعمال کی آوازیں دور دراز علاقوں تک سنی گئیں۔
اطلاعات کے مطابق گزشتہ روز بھی افغانستان کی جانب سے ضلع کرم کی مختلف سرحدی چوکیوں، جن میں بوڑکی، خرلاچی اور سپینہ شگہ شامل ہیں، کو نشانہ بنایا گیا تھا۔
جوابی کارروائی کے دوران سرحد پار بعض مقامات پر آگ کے شعلے بلند ہوتے دیکھے گئے جبکہ متعدد پوسٹوں کو نقصان پہنچنے کی اطلاعات بھی ہیں۔
سیکیورٹی حکام کے مطابق اب تک پاکستان فورسز کو کسی جانی نقصان کی اطلاع نہیں ملی، جبکہ حملہ آوروں کو خاطر خواہ نقصان پہنچا ہے۔ علاقے میں کشیدگی برقرار ہے اور سیکیورٹی ہائی الرٹ کر دی گئی ہے۔
مقامی انتظامیہ نے عوام سے اپیل کی ہے کہ وہ غیر ضروری نقل و حرکت سے گریز کریں اور حفاظتی ہدایات پر عمل کریں۔ صورتحال پر حکام کی جانب سے مسلسل نظر رکھی جا رہی ہے۔
