کراچی پولیس نے شہر کے لیاری ایکسپریس وے سے دبئی سے واپس آنے والے 3 اسٹریٹ کرمنلز کو گرفتار کرلیا۔
تفصیلات کے مطابق لیاری ایکسپریس وے پر پولیس نے کارروائی کرتے ہوئے تین ڈاکوؤں کو گرفتار کرلیا۔ گرفتار ہونے والوں میں میڈیا سائنس کا گریجویٹ بھی شامل ہے جو حال ہی میں دبئی سے کراچی واپس آیا.ذرائع کے مطابق اسٹریٹ کرمنل انس نے بتایا کہ وہ میڈیا سائنس کا گریجویٹ ہے اور دبئی سے عیدالاضحی کی چھٹیوں میں کراچی واپس آیا ہے۔ انس نے انکشاف کیا کہ اس کے پاس 15 دنوں میں دبئی کا کنفرم ریٹرن ٹکٹ تھا۔
انس نے اعتراف کیا کہ اس نے عید کے بعد ڈکیتی کی وارداتیں شروع کیں اور اس کے بعد سے تقریباً 80 وارداتوں میں ملوث رہا ہے۔ اس نے دبئی کے ایک ریسٹورنٹ میں بطور کیشیئر کام کرنے کا بھی ذکر کیا، جس کی تنخواہ 1200 درہم تھی۔انس نے منشیات کے عادی ہونے کا اعتراف کیا اور انکشاف کیا کہ اس نے کراچی یونیورسٹی سے میڈیا سائنس میں گریجویشن کیا ہوا ہے۔
