اسلام آباد: وزارت خارجہ کی ترجمان ممتاز زہرا بلوچ نے اپنے ایک بیان میں کہا ہے کہ چینی وزیراعظم لی چیانگ اعلیٰ سطح کے وفد کے ہمراہ 14 سے 17 اکتوبر تک پاکستان کا دورہ کریں گے ۔
ترجمان کے مطابق دورہ پاکستان میں چینی وزیراعظم کے ہمراہ وزارت خارجہ، وزارت تجارت، قومی ترقیاتی اصلاحاتی کمیشن کے نمائندے اور دیگر اعلیٰ حکام بھی ہوں گے۔
بیان میں کہا گیا ہے کہ چینی وزیراعظم شنگھائی تعاون تنظیم کے سربراہی اجلاس میں بھی شرکت کریں گے۔
ممتاز زہرا بلوچ کے بیان کے مطابق چینی وفد میں چین کی بین الاقوامی ترقیاتی تعاون ایجنسی کے نمائندے بھی پاکستان کے دورے پر آئیں گے ۔
ترجمان کا میزد کہنا تھا کہ وزیراعظم شہباز شریف اور چینی وزیراعظم پاک چین تعلقات کے تمام پہلوؤں پر تبادلہ خیال کریں گے۔ پاک چین رہنما علاقائی اور عالمی پیش رفت پر بھی بات کریں گے۔
ترجمان دفتر خارجہ کے مطابق چینی وزیراعظم صدر آصف علی زرداری، پارلیمانی رہنماؤں اور پاکستان کی اعلیٰ عسکری قیادت سے بھی ملاقاتیں کریں گے۔
