وزیراعظم شہبازشریف نے تقریب کے موقع پر کامیڈین شفاعت علی کو اپنی نقل اتارنے کے لیے اسٹیج پر بلایا جس کے بعد یہ ویڈیو سوشل میڈیا پر خاصی وائرل ہورہی ہے۔
وزیراعطم شہباز شریف نے اذلان شاہ ٹورنامنٹ کھیلنے والے کھلاڑیوں کے اعزاز میں رکھی گئی تقریب سے خطاب کیا اس تقریب میں شفاعت علی بھی موجود تھے۔ اسٹیج پر بلائے جانے کے بعد کامیڈین شفاعت علی نے وزیراعطم شہبازشریف کی فرمائش پر ان کے لہجے کی نقل اتاری جس پر پورا ہال قہقہوں اورتالیوں سے گونج اٹھا۔وزیراعظم شہبازشریف اور کامیڈین کے مکالمے سے شرکا ہنس ہنس کے لوٹ پوٹ ہوگئے جبکہ کامیڈین اور وزیر اعظم شہبازشریف بھی اپنی ہنسی کو روک نہ سکے۔
نامور شخصیات اورسیاستدانوں کی نقالی سے شہرت پانے والے شفاعت علی وزیراعظم کے سامنے ان کی نقل اتارتے ہوئے نروس ہوگئے۔ وزیر اعظم نے ان سے کہا کہ ‘شفاعت صاحب آپ کی مہربانی لیکن آج آپ نے کوئی چٹکلہ نہیں سنایا،آئیں کوئی چٹکلہ تو سنائیں۔ جس پر شفاعت نے جواب دیا کہ ‘سرآپ نے بہت مشکل کردیا ‘، وزیر اعظم نے کہا کہ بھئی مجھ پر رحم کریں، باقی آپ جو مرضی کریں ، چلیں جو مجھ پر کیا تھا، وہیں کردیں’۔
کامیڈین شفاعت علی کی وزیراعظم نے مسکراتے ہوئے حوصلہ افزائی کی، وزیراعظم کے لہجے میں وزیراعظم یوتھ پروگرام کے چیئرمین رانا مشہود احمد خان کو مخاطب کرتے ہوئے شفاعت علی نے کہاکہ ‘رانا صاحب ایک ہفتے میں یہ بچے بھرتی نظر نہ آئے تو پھر اس حوالے سے ایک میٹنگ ہوگی جس میں دیگر باتیں ہوں گی لیکن سپورٹس پر بات نہیں ہوگی’۔
شفاعت علی کی طرف سے وزیراعظم کی نقل اتارنے پر پر وزیراعظم شہبازشریف، رانا مشہود اور وزیراطلاعات عطا تارڑ سمیت ہال میں موجود تمام افراد نےبے ساختہ قہقہے لگائے۔ شرکا نے تبصرہ کیا کہ اپنی موجودگی میں وزیراعظم نے کامیڈین کی میمکری کراکے کھلے دِل، خود پر تنقید اور ٹینلٹ کی حوصلہ افزائی کی روایت قائم کی ہے ۔
