کوئٹہ میں مسجد کے حجرے میں گیس کا دھماکا ہوا جس کے باعث ایک پولیس اہلکار جاں بحق جبکہ 10 افراد زخمی ہوگئے ہیں
کوئٹہ: کچلاک کی کلی کتیر کی مسجد میں ہونے والے دھماکے کے نتیجے میں ایک پولیس اہلکار جاں بحق ہوگیا جبکہ10 افراد زخمی ہوئے ہیں۔پولیس حکام کے مطابق کچلاک کی کلی کتیر کی مسجد میںاس وقت دھماکا ہوا جب ایگل اسکواڈ کے اہلکار دیگر نمازیوں کے ہمراہ نماز مغرب کی ادائیگی کے بعد مسجد سے ملحقہ حجرے میں چائے پی رہے تھے۔پولیس کے مطابق دھماکے کی وجہ سے ایک پولیس اہلکار محمد انور جاں بحق اور 3 پولیس اہلکاروں سمیت 10 افراد زخمی ہوگئے جبکہ مسجد کا ایک حصہ دھماکے سے بھی گرگیا ہے،طبی امداد کیلئے زخمی افراد کو سول اسپتال کوئٹہ منتقل کردیا گیا ہے،جہاں ایگل اسکوارڈ کے تین اہلکاروں کی حالت تشویش ناک بتائی جاتی ہے۔ایس ایس پی آپریشنز کوئٹہ جواد طارق کے مطابق کچلاک دھماکے میں دہشتگردی کے کوئی شواہد نہیں ملے، دھماکا مسجد کے حجرے میں گیس لیکج کے باعث ہوا ہے۔
