اسلام آباد میں خاتون سے مبینہ زیادتی کے 2 ملزمان گرفتار، تعلق صوابی سے ہے

اسلام آباد پولیس کے ذرائع نے دعویٰ کیا ہے کہ ایف نائن پارک میں خاتون سے مبینہ زیادتی کے دونوں ملزمان کو گرفتار کرلیا گیا۔ پولیس ذرائع کا کہنا ہے کہ ملزمان کو تھانہ گولڑہ کی حدود سے گرفتار کیا گیا اور دونوں نے اقبال جرم بھی کرلیا۔ پولیس ذرائع نے بتایا کہ خاتون سے زیادتی کے واقعے کا مقدمہ تھانہ مارگلہ میں درج ہے۔ملزمان کو سیف سٹی کیمروں کی مدد سے گرفتار کیا گیا اور دونوں ملزمان کا تعلق صوابی سے ہے۔ پولیس ذرائع کے مطابق متاثرہ خاتون نے بھی ملزمان کو شناخت کر لیا ہے۔

دوسری جانب پولیس ترجمان کا کہنا ہے کہ ایف نائن پارک میں خاتون سے مبینہ زیادتی کے واقعےکی تفتیش میں پیشرفت ہوئی ہے، پولیس نے ملزمان کا سراغ لگا لیا ہے تاہم تاحال کوئی گرفتاری عمل میں نہیں لائی گئی،  وقوعہ سے متعلق پیش رفت سے آگاہ کیا جائےگا۔ خیال رہے کہ 2 فروری کو اسلام آباد کے ایف 9 پارک میں میاں چنوں کی رہائشی لڑکی کے ساتھ مبینہ طور پر اجتماعی زیادتی کا واقعہ پیش آیا تھا۔

لڑکی ہواخوری کیلئے دوست کے ساتھ پارک آئی تھی، مسلح افراد نے چہل قدمی کرتے وقت روکا، لڑکی کو الگ لے گئے، جان سے مارنے کی دھمکی دی، شور کرنے پر تھپڑ مارے، درختوں کے جھنڈ میں لے جا کر تشدد کیا، کپڑے پھاڑ ڈالے اور زیادتی کا نشانہ بنایا۔ پولیس کو بیان میں لڑکی نے بتایا تھاکہ دو حملہ آوروں نے زیادتی کی، زیادتی کے بعد کپڑے دور پھینک دیے تاکہ وہ بھاگ نہ سکے، حملہ آوروں کو دہائیاں دیں پر وہ باز نہ آئے، ملزمان نے زیادتی کے بعد کہا کہ شام کے وقت پارک نہ آیا کرو۔