ڈی جی آئی ایس پی آر لیفٹننٹ جنرل احمد شریف چوہدری کا کہنا ہے کہ بلوچستان کبھی پاکستان سے علیحدہ نہیں ہوسکتا۔ کشمیر پاکستان کا ہے، رہے گا، اس میں کوئی شک نہیں۔
پاک فوج کے شعبہ تعلقات عامہ (آئی ایس پی آر) کے زیراہتمام ہلال ٹاک 2025 پروگرام میں ملک بھر سے آئے سیکڑوں اساتذہ کرام سے گفتگو میں ڈی جی آئی ایس پی آر لیفٹننٹ جنرل احمد شریف چوہدری نے کہا کہ بلوچستان کبھی پاکستان سے علیحدہ نہیں ہو سکتا، یہ ہماری معیشت اور ثقافت میں رچا بسا ہے۔
ترجمان پاک فوج نے کہا کہ بھارت بلوچستان میں دہشتگردی کا سرپرست ہے اور پورے خطے میں عدم استحکام کی جڑ ہے فتنہ الہندوستان کے ایجنٹ بلوچستان کی ترقی کے دشمن ہیں، یہ دہشتگرد بھارت سے پیسے لیتے ہیں، تربیت لیتے ہیں، بھارت کی سہولت کاری سے پاکستان میں دہشتگردی پھیلاتے ہیں۔
ڈی جی آئی ایس پی آر کے مطابق دہشتگردوں کی لاشوں پر سیاست کرنے والے، دہشتگردی کے سہولت کار ہیں، کشمیر پاکستان کا ہے، رہے گا، اس میں کوئی شک نہیں، بھارت کی اسٹریٹیجک غلط فہمیاں خاک میں مل چکی ہیں۔
لیفٹننٹ جنرل احمد شریف چوہدری نے کہا کہ دہشتگردوں کا مقابلہ تعلیم، روزگار اور ترقی سے ممکن ہے، افواجِ پاکستان، عوام کی فوج ہے، ان کے درمیان کوئی فاصلہ نہیں، یہ فوج پولیو سے لے کر دہشتگردوں تک، ہر محاذ پر عوام کے ساتھ کھڑی ہے۔
