Latest Urdu news from Pakistan - Peshawar, Lahore, Islamabad

عمران خان سے گھڑی خریدنے والے سے فواد چوہدری کے مسلسل رابطوں کے مبینہ ثبوت سامنے آ گئے

سعودی ولی عہد کی جانب سے سابق وزیراعظم عمران خان کو دیے گئے قیمتی تحفے خریدنے والے بزنس مین عمر فاروق ظہور کو مشکوک شخص قرار دینے والے فواد چوہدری کے عمر فاروق سے حالیہ روابط سامنے آگئے۔ فواد چوہدری عمر فاروق کو واٹس ایپ پر میسجز کرکے عمران خان کا نام نہ لینے کی درخواست کرتے رہے۔

نجی ٹی وی کے پروگرام  میں تفصیلات بتاتے ہوئے میزبان  نے مبینہ واٹس ایپ چیٹ کے اسکرین شارٹس بھی دکھائے۔ اس سے پہلے فواد چوہدری عمر فاروق کو حکومت پاکستان کے ٹھیکوں میں مدد دلوانے کا وعدہ بھی کرتے رہے۔ توشہ خانے کی قیمتی گھڑی فروخت کرنے کے بعد نیا اسکینڈل سامنے آ گیا، عمران خان سے گھڑی خریدنے والے عمر فاروق سے فواد چوہدری کے مسلسل رابطوں کے مبینہ ثبوت سامنے آ گئے ۔

جب فواد چوہدری عمر فاروق کو جھوٹا قرار دے رہے ہیں، اس سے کچھ گھنٹے پہلے انھیں اپنا بھائی بتا رہے تھے، منگل کو عمر فاروق نے عمران خان سے گھڑی خریدنے کا انکشاف کیا تو اس کے فوری بعد فواد چوہدری نے ان سے رابطہ کیا اور پوچھا کہ ’کی ہو گیا جی؟ شہزاد اکبر تک تو بات سمجھ میں آتی ہے مگر عمران خان کیوں؟‘ عمر فاروق سے واٹس ایپ گفتگو کرنے والے شخص کا نمبر چیک کیا گیا تو وہ بھی فواد چوہدری کا نکلا، دونوں کے درمیان ماضی کی واٹس ایپ چیٹ میں اور بھی انکشافات سامنے آئے ہیں۔

ایک بار عمر فاروق نے اپنے خلاف کیس بنانے پر شہزاد اکبر کی شکایت کی تو فواد چوہدری نے ان کی تائید کی اور مقدمات کو خوف ناک قرار دیا۔ فواد چوہدری عمر فاروق سے دبئی میں ملتے بھی رہے، یاٹ پر بھی ملاقات ہوئی ، عمر فاروق اور فواد چوہدری تحریک انصاف کی حکومت کے دوران ویکسین، ای اسپورٹس اور آئی ٹی سیکٹر سے متعلق کاروباری منصوبہ بندی کیلئے  پیغامات کا تبادلہ بھی کرتے نظر آئے ہیں۔

اس سے پہلے بدھ کو فواد چوہدری نے پریس کانفرنس میں عمر فاروق کے خلاف دبئی میں قانونی کارروائی کا اعلان کرتے ہوئے کہا تھا کہ گھڑی عمر فاروق کو نہیں بیچی گئی، جب کہ زلفی بخاری نے کہا کہ عمران خان نے گھڑی جس ڈیلر کو بیچی تھی وہ پاکستان سے بھاگ گیا۔

جواب چھوڑیں

آپ کا ای میل ایڈریس شائع نہیں کیا جائے گا.