پاکستانی اداکار نعیم ہاشمی کو مداحوں سے بچھڑے 48 برس بیت گئے ہیں۔
پاکستانی فلم انڈسٹری کے مشہور اداکار نعیم ہاشمی کو مداحوں سے بچھڑے 48 برس بیت گئے ہیں، فلمی صنعت کیلئے نعیم ہاشمی کی خدمات ناقابل فراموش ہیں، انہوں نے ہی پاکستان میں پہلا سٹیج ڈرامے کا آغاز کیا تھا۔ قیام پاکستان سے قبل نعیم ہاشمی نے اداکاری کا آغاز کیا، آپ نے لاہور میں سٹیج ڈراموں میں بھی فن کے جوہر دکھائے، ان کی سب سے پہلی فلم ’’دیوانے دو‘‘ تھی، نعیم ہاشمی نے 50 کی دہائی میں ولن جبکہ 60 اور 70 کی دہائی میں کیریکٹر ایکٹر کے طور پر کام کیا، مکالمے کی جاندار قسم کی ڈیلوری ان کی پہچان تھی۔
نعیم ہاشمی کی ہر دلعزیز فلموں میں ’’چھوٹی بیگم‘‘، ’’سرفروش‘‘، ’’دروازہ‘‘، ’’ایاز‘‘، ’’بنارسی ٹھگ‘‘ اور ’’بابل‘‘ کے نام شامل ہیں، نعیم ہاشمی نے الزام، نگار، جادوگر، شوہر، خاتون سمیت کئی فلموں کی کہانیاں اور گیت بھی لکھے، فلم نور اسلام اور عظمت اسلام کیلئے ان کی لکھی گئی نعتیں ہمیشہ کے لئے امر ہوچکی ہیں۔آپ نے 1948ء میں پاک بھارت جنگ کے دوران کشمیر کے محاذ پر جا کر مسئلہ کشمیر پر پہلی ڈاکیو منٹری فلم ’’انقلاب کشمیر‘‘بھی بنائی، پاکستانی فلم انڈسٹری کے بانیوں میں شامل کہنہ مشق یہ عظیم فنکار27اپریل 1976ء کو اس دار فانی سے رخصت کر گئے تھے۔
