ادیس ابابا: افریقی ملک ایتھوپیا میں ایک افسوسناک حادثہ پیش آیا، جہاں ایک عوام سے بھرا ٹرک بے قابو ہو کر دریا میں گر گیا، جس کے نتیجے میں 71 افراد ہلاک ہوگئے۔
غیر ملکی خبر ایجنسی کے مطابق یہ حادثہ ضلع بونا میں پیش آیا۔ حادثے میں ہلاک ہونے والے افراد میں 68 مرد اور 3 خواتین شامل ہیں۔ مسافر شادی میں شرکت کے لیے جا رہے تھے، اور حادثے میں زخمی ہونے والے افراد کو بونا جرنل اسپتال میں فوری طور پر طبی امداد دی جارہی ہے۔
ایتھوپیا کے سرکاری ٹی وی کے مطابق ٹرک میں سوار افراد کی زیادہ تر تعداد شادی کی تقریب میں شریک ہونے کے لیے جا رہی تھی۔
ایتھوپیا میں سڑکوں پر ٹریفک کے خراب حالات اور گاڑیوں کی مناسب فٹنس نہ ہونے کی وجہ سے ہر سال کئی جان لیوا حادثات ہوتے ہیں۔ 2018 میں بھی ایک بس کھائی میں گرنے سے 38 افراد کی جانیں گئی تھیں جن میں اکثریت طالب علموں کی تھی۔
