16 دسمبر 2014 کو ملک کی تاریخ کا دردناک واقعہ پیش آیا. آرمی پبلک اسکول (اے پی ایس) پشاور میں ہونے والے اس دل خراش واقعے نے سینکڑوں ماؤں کی گودیں اجاڑ دیں۔ فورسز کی وردیاں پہنے علم دشمن 6 دہشتگرد آرمی پبلک اسکول میں داخل ہوئے اور طلبا پر اندھا دھند فائرنگ کر دی جس سے معصوم طلبا اور بے گناہ اساتذہ شہید ہو گے۔
حملے کے فوری بعد سکیورٹی فورسز نے اسکول کا گھیراؤ کیا اور کالعدم ٹی ٹی پی کے 6 خودکش حملہ آوروں کو طویل آپریشن کے بعد ہلاک کر ڈالا۔دہشتگردوں سے مقابلے میں 2 افسروں سمیت 9 سکیورٹی اہلکار زخمی ہوئے، اس کے علاوہ آرمی پبلک اسکول حملے میں ملوث 6 دہشتگردوں کو سکیورٹی فورسز نے گرفتار کیا جنہیں ملٹری کورٹس نے موت کی سزائیں سنائیں۔
اس دن ہر دل اور آنکھ اس افسردہ واقعہ پر خون کے آنسو رو رہا تھا۔سانحہ آرمی پبلک اسکول نے دہشتگردی کے خلاف جنگ میں نئی روح پھونکی اور یوں نیشنل ایکشن پلان تشکیل دیا گیا اور قبائلی علاقوں سے دہشتگردی کا خاتمہ بھی ہوا۔
سانحہ آرمی پبلک اسکول کے نتیجے میں جہاں ملک سے دہشت گردی کا خاتمہ ممکن ہوا وہیں علم دشمن عناصر کے ناپاک ارادے بھی خاک میں مل گئے۔پاکستانی قوم 16 دسمبر کے تمام شہداء کو خراج تحسین پیش کرتی ہے اور شہدا کے لواحقین سے اظہار ہمدردی کرتی ہے۔
