خیبر پختونخوا کے بیشتر اضلاع میں آج سے 20 مارچ تک تیز ہواؤں اور گرج چمک کے ساتھ مزید بارش کا امکان ظاہر کیا گیا ہے، جس کے بعد پراونشل ڈیزاسٹر مینجمنٹ اتھارٹی (پی ڈی ایم اے) نے الرٹ جاری کر دیا ہے۔
پی ڈی ایم اے کے جاری کردہ بیان کے مطابق متوقع بارشوں کے پیش نظر صوبے بھر کی ضلعی انتظامیہ کو پیشگی ہنگامی اقدامات اٹھانے کی ہدایت کی گئی ہے تاکہ کسی بھی ناخوشگوار صورتحال سے نمٹا جا سکے۔
محکمہ موسمیات کی پیشگوئی کے مطابق اپر دیر، لوئر دیر، اپر چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ اور مہمند کے مختلف علاقوں میں آج سے 20 مارچ تک بارش کا امکان ہے۔
اس کے علاوہ کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی وزیرستان اور جنوبی وزیرستان میں بھی تیز ہواؤں کے ساتھ بارش کی پیشگوئی کی گئی ہے۔
پی ڈی ایم اے نے شہریوں کو ہدایت کی ہے کہ وہ احتیاطی تدابیر اختیار کریں اور غیر ضروری سفر سے گریز کریں، جبکہ متعلقہ اداروں کو الرٹ رہنے اور بروقت اقدامات یقینی بنانے کا حکم دیا گیا ہے۔
