وزیرِاعظم محمد شہباز شریف کی زیر صدارت خطے کی موجودہ صورتحال کے پیش نظر ایندھن کی بچت اور کفایت شعاری اقدامات کے نفاذ سے متعلق ایک اہم جائزہ اجلاس منعقد ہوا۔ اجلاس میں متعلقہ حکام نے وزیرِاعظم کو بچت اقدامات پر عملدرآمد کی پیش رفت سے آگاہ کیا۔
بریفنگ میں بتایا گیا کہ وزیرِاعظم کی جانب سے جاری کردہ ہدایات پر مکمل عملدرآمد یقینی بنایا جا رہا ہے، جبکہ انٹیلی جنس بیورو تمام اقدامات کی نگرانی کرتے ہوئے اپنی رپورٹ پیش کرے گا۔ حکام کے مطابق ملک میں پیٹرولیم مصنوعات کا ضروریات کے مطابق مناسب ذخیرہ موجود ہے اور سپلائی چین کو مزید بہتر بنانے کے لیے اقدامات جاری ہیں۔
وزیرِاعظم نے وزیرِ پیٹرولیم کو ہدایت کی کہ وہ پیٹرولیم درآمدات کی سپلائی چین کو مزید مؤثر بنانے کے لیے متحرک کردار ادا کریں۔ انہوں نے اس بات پر بھی زور دیا کہ حالات کی بہتری تک تمام متعلقہ ادارے ہنگامی اقدامات کے لیے مکمل طور پر تیار رہیں۔
اجلاس کو بتایا گیا کہ پیٹرولیم مصنوعات کی مسلسل نگرانی کی جا رہی ہے اور مکمل ریکارڈ رکھا جا رہا ہے تاکہ کسی بھی بے ضابطگی کی فوری نشاندہی ممکن ہو سکے۔ مزید برآں، کابینہ ارکان نے رضاکارانہ طور پر تنخواہیں نہ لینے کا فیصلہ کیا ہے، جبکہ سرکاری محکموں میں تیل کی کھپت میں کمی کے مثبت نتائج سامنے آ رہے ہیں۔
حکام کے مطابق ملک میں ادویات کا بھی مناسب ذخیرہ موجود ہے تاکہ عوام کی ضروریات پوری کی جا سکیں۔ اس کے علاوہ، ورک فرام ہوم سہولت کو بہتر بنانے کے لیے وزارت انفارمیشن ٹیکنالوجی و ٹیلی کام کی جانب سے ای-آفس کے لیے خصوصی کنیکٹیویٹی کے انتظامات مکمل کر لیے گئے ہیں۔
