اسلام آباد: وفاقی دارالحکومت میں خیبرپختونخوا کے ضلع کرم میں قیام امن کے لئے فریقین کے جرگے کا پہلا دور خوشگوار ماحول میں ختم ہو گیا ،جرگے کا دوسرا دور کل پشاور میں ہوگا ۔
ممبر ضلع کرم سید رضا حسین کے مطابق جرگہ میں سوشل میڈیا کے غلط استعمال کی روک تھام سمیت قیام امن کے لئے ضروری اقدامات پر بات چیت ہوئی ، دونوں فریقین کے عمائدین کےجرگے کی دوسری نشست کل پشاور میں ہوگی ۔
انہوں نے مزید کہا کہ ضلع کرم کے عوام امن کے لئے ترس رہے ہیں اور قیام امن چاہتے ہیں، طویل بدامنی کے دوران پہلی بار عمائدین آپس میں بیٹھے، ایک دوسرے سے گلے شکوے کئے ۔
ممبر سجاد سید میاں کا کہنا تھا کہ قیام امن کے لئے عمائدین کو قریب لانے کی کوشش کی ہے، فریقین کے درمیان اچھے ماحول میں بات چیت ہوئی ، امید ہے یہ بات اسی طرح جاری رہے اور مذاکرات نتیجہ خیز ثابت ہوں ۔
ان کا مزید کہنا تھا کہ جرگہ میں ایک دوسرے کے حقوق کا خیال رکھنے پر اتفاق کیا گیا، فریقین ایک دوسرے کے مقدس مقامات کا احترام کریں گے ۔
