پاکستان میں کاروبار کے فروغ کے لیے ایک اہم قدم اٹھایا گیا ہے جس کے تحت سیکیورٹیز اینڈ ایکسچینج کمیشن آف پاکستان نے جنوری 2025 میں نئی کمپنیوں کی رجسٹریشن میں تاریخی اضافہ ریکارڈ کیا ہے۔ ایس آئی ایف سی کی حمایت اور جدید سہولت کاری کے باعث اس سال کے ابتدائی مہینے میں 3,442 نئی کمپنیاں رجسٹر ہوئیں، جو کہ پچھلے سال کی ماہانہ اوسط سے 39 فیصد زیادہ ہے۔
اس اضافے کا بڑا سبب ایس آئی ایف سی کی طرف سے نئی کمپنیوں کے لیے فراہم کیا گیا معاون اور سازگار ماحول ہے۔ ایس آئی ایف سی کی پالیسیوں نے کاروباری اداروں کے لیے رجسٹریشن کے عمل کو نہ صرف آسان بنایا ہے بلکہ اس کے نتیجے میں کاروبار کے نئے مواقع اور سرمایہ کاری کی بڑھتی ہوئی دلچسپی بھی سامنے آئی ہے۔
انفارمیشن ٹیکنالوجی اور ای کامرس کے شعبے میں 652 نئی کمپنیاں رجسٹر ہوئیں، جو کہ اس وقت کی سب سے زیادہ بڑھوتری ہے۔ اسی طرح ٹریڈنگ سیکٹر میں 463، سروسز میں 411، اور رئیل اسٹیٹ و کنسٹرکشن میں 311 نئی کمپنیاں قائم ہوئیں۔
اس کے علاوہ، سیاحت، ٹرانسپورٹ، فوڈ اینڈ بیوریجز، ہیلتھ کیئر اور دیگر شعبوں میں بھی نمایاں اضافہ دیکھنے کو ملا ہے، جس سے پاکستان کے بڑھتے ہوئے کاروباری ماحول اور سرمایہ کاروں کے بڑھتے اعتماد کا واضح اشارہ ملتا ہے۔
ایس آئی ایف سی کی معاونت اور ایس ای سی پی کے اس تاریخی سنگ میل کا مطلب یہ ہے کہ پاکستان میں کاروبار کرنے کے عمل کو مزید آسان اور سہل بنایا گیا ہے، جو کہ اس بات کا عکاس ہے کہ پاکستان ایک جدید، کاروبار دوست اور ترقی پذیر معیشت کے طور پر ابھر رہا ہے۔
