ترجمان دفتر خارجہ شفقت علی خان نے ہفتہ وار پریس بریفنگ میں بتایا کہ ایران میں موجود پاکستانیوں کے انخلاء کا عمل تیزی سے جاری ہے اور اب تک تقریباً 3 ہزار پاکستانی شہری محفوظ طور پر وطن واپس پہنچ چکے ہیں۔ اس سلسلے میں تہران میں پاکستانی سفارتخانہ بھرپور کردار ادا کر رہا ہے۔
ترجمان نے کہا کہ ایران اسرائیل تنازع کا واحد حل مذاکرات ہیں، اور پاکستان ایران پر اسرائیلی جارحیت کی شدید ترین الفاظ میں مذمت کرتا ہے۔ ان کے مطابق، ایران پر اسرائیلی حملہ نہ صرف اقوام متحدہ کے چارٹر بلکہ بین الاقوامی قوانین کی بھی کھلی خلاف ورزی ہے۔
انہوں نے عالمی برادری سے مطالبہ کیا کہ اسرائیل کو انصاف کے کٹہرے میں لایا جائے، اور بتایا کہ اسرائیلی حملے کو 21 مسلم ممالک نے بھی ایک مشترکہ اعلامیے میں مسترد کر دیا ہے۔
ترجمان دفتر خارجہ نے مزید کہا"ایران کو بین الاقوامی قانون کے تحت اپنے دفاع کا پورا حق حاصل ہے، اور پاکستان ایران کا قریبی دوست، ہمسایہ اور قابل اعتماد شراکت دار ہے۔ دونوں ممالک ہر سطح پر مسلسل رابطے میں ہیں۔”
علاقائی اور عالمی تناظر میں بات کرتے ہوئے انہوں نے انکشاف کیا کہ:پاکستان اور یورپی یونین کے درمیان جوہری عدم پھیلاؤ پر بات چیت ہوئی ہے۔مقبوضہ کشمیر میں انسانی حقوق کی سنگین خلاف ورزیوں پر پاکستان نے شدید تحفظات کا اظہار کیا ہے۔
آخر میں ترجمان نے ایران میں مبینہ ‘رجیم چینج’ کی قیاس آرائیوں کو محض افواہیں قرار دیتے ہوئے مسترد کیا اور واضح کیا کہ ایران عالمی جوہری ادارے سے مسلسل رابطے میں ہے۔
