فیلڈمارشل عاصم منیر کا کہنا ہے کہ پاکستان دہشتگردی کیخلاف عالمی جنگ میں فرنٹ لائن پر رہاہے، پاکستان نے محفوظ دنیا کے حصول میں بے پناہ جانی اور معاشی قربانیاں دی ہیں۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر کی سرکاری دورہ امریکا کے دوران اہم ملاقاتیں جاری ہیں، فیلڈ مارشل نے واشنگٹن میں ممتاز اسکالرز اور سینئرتجزیہ کاروں سے ملاقات کی،عالمی میڈیا کے نمائندوں سے بھی ملے۔
ترجمان پاک فوج کے مطابق فیلڈمارشل عاصم منیر نے امریکی تھنک ٹینکس اور اسٹریٹجک امور کے اداروں کے نمائندوں سے بھی گفتگو کی اور عالمی مسائل پر پاکستان کے اصولی مؤقف کو بیان کیا۔ خطے میں امن واستحکام کیلئے پاکستان کے غیرمتزلزل عزم پر روشنی ڈالی۔ شرکا نے فیلڈمارشل کے واضح، شفاف اور حقیقت پسندانہ تجزیے کو سراہا۔
ترجمان پاک فوج کے مطابق فیلڈمارشل عاصم منیر نے کہا کہ پاکستان میں آئی ٹی، زراعت، کان کنی، معدنیات میں وسیع، کم استعمال شدہ ذخائر ہیں، عالمی شراکت داروں کوان شعبوں میں مشترکہ خوشحالی کے مواقع تلاش کرنے کی دعوت دی۔
آرمی چیف نے امریکی تھنک ٹینکس اور اسٹریٹجک امور کے اداروں کے نمائندوں سے ملاقات میں معرکہ حق، بنیان مرصوص کے حقائق وتجزیات سے ماہرین کو آگاہ کیا فیلڈ مارشل عاصم منیر نے دہشتگردی پر پاکستان کے نقطہ نظر کی وضاحت کی اور دہشتگردی کو ہائبرڈ وار فیئر کے طور پر استعمال کرنیوالے عناصر کی نشاندہی کی۔
فیلڈمارشل عاصم منیر نے علاقائی وعالمی تنازعات پر پاکستان کے متوازن، اصولی مؤقف پر مبنی پالیسی کی وضاحت کی، کہا پاکستان نے محفوظ دنیا کے حصول میں بے پناہ جانی اور معاشی قربانیاں دی ہیں، پاکستان علاقائی کشیدگی کم کرنے میں ذمہ دارانہ اور فعال کردار ادا کرتا ہے، مذاکرات، سفارتکاری اور بین الاقوامی قانون کی پاسداری ہی امن کا راستہ ہے۔
