باجوڑ میں اے این پی کے رہنما مولانا خانزیب کی نماز جنازہ ادا کردی گئی جس میں بڑی تعداد میں لوگ شریک ہوئے، دوسری جانب مولانا خانزیب پر حملے کا مقدمہ سی ٹی ڈی تھانے میں درج کردیا گیا، ان کے قتل کی رپورٹ سینٹرل پولیس آفس کو ارسال کردی گئی ۔
باجوڑ: گزشتہ روز باجوڑ کے علاقے شنڈئی موڑ میں دہشتگردوں کی فائرنگ سے شہید کیے گئے اے این پی رہنما مولانا خان زیب کی نماز جنازہ ادا کردی گئی، انہیں ان کے آبائی علاقے ناؤگئی میں سپرد خاک کردیا گیا، نماز جنازہ اے این پی کے صوبائی صدر افتخار حسین، سردار حسین بابک، باجوڑ کے اراکین اسمبلی نثار باز سمیت ہزاروں افراد نے شرکت کی ۔
پولیس کے مطابق واقعے کا مقدمہ تھانہ سی ٹی ڈی خار باجوڑ میں درج کیا گیا ہے جو کہ تھانہ خار کے ایس ایچ او کی مدعیت میں درج کیا گیا ہے ۔
رپورٹ میں بتایا گیا ہے کہ عینی شاہدین کے مطابق 2 موٹر سائیکلوں پر سوار 5 افراد نے ان پر فائرنگ کی، دہشت گردوں کا ٹارگٹ مولانا خان زیب ہی تھے، دو مقامات کی جیوفینسنگ کی جارہی ہے، فائرنگ سے مولانا خان زیب اور کانسٹیبل شیر زادہ شہید جب کہ تین افراد زخمی بھی ہوئے، واقعہ کی جگہ سے پستول کی گولیوں کے 35 خول برآمد ہوئے ۔
