ملک بھر میں مون سون کی بارشوں کی تباہ کاریاں جاری ہیں، نیشنل ڈیزاسٹر مینجمنٹ اتھارٹی نے بارشوں سے ہونے والے جانی و مالی نقصانات کی رپورٹ جاری کر دی،رپورٹ کے مطابق بارشوں کے دوران مختلف حادثات میں جاں بحق افراد کی تعداد 245 ہوگئی، جبکہ 600 سے زائد افراد زخمی بھی ہوئے ۔
اسلام آباد: این ڈی ایم اے کی جانب سے مون سون بارشوں کے دوران نقصانات سے متعلق جاری رپورٹ میں کہا گیا ہے کہ ملک میں بارشوں کے باعث 26 جون سے اب تک 245 افراد جاں بحق اور 602 زخمی ہو چکے ہیں ۔
این ڈی ایم کی رپورٹ کے مطابق گزشتہ 24 گھنٹوں میں بارشوں کے باعث خیبرپختونخوا میں 3 لوگ جاں بحق اور 2 افراد زخمی ہوئے جبکہ اسلام آباد میں 2 افراد زخمی ہوئے ۔
رپورٹ کے مطابق پنجاب میں 26 جون سے اب تک 135 افراد جاں بحق اور 470 زخمی ہوئے، خیبر پختونخوا میں 59 افراد جاں بحق اور 73 زخمی ہوئے ۔
رپورٹ میں کہا گیا ہے کہ سندھ میں اب تک 24 افراد جاں بحق اور 40 افراد زخمی ہوئے جبکہ بارشوں کے باعث بلوچستان میں اب تک 16 افراد جاں بحق اور 4 افراد زخمی ہوئے ہیں ۔
اس دوران گلگت بلتستان میں بارشوں کے باعث 3 افراد جاں بحق اور 4 زخمی ہوئے، آزاد کشمیر میں بارشوں کے باعث 2 افراد جاں بحق اور 8 زخمی ہوئے جب کہ اسلام آباد میں 6 افراد جاں بحق اور 3 افراد زخمی ہوئے ہیں ۔
این ڈی ایم اے نے مزید بتایا کہ بارشوں کے باعث جاں بحق ہونے والوں میں 83 مرد، 44 خواتین اور 118 بچے شامل ہیں، زخمی ہونے والے افراد میں 232 مرد، 168خواتین اور 202 بچے شامل ہیں ۔
این ڈی ایم اے کے مطابق بارشوں کے باعث 854 گھر گرے اور 208 مویشی ہلاک ہوئے، زیادہ تر اموات گھر گرنے، ڈوبنے، لینڈ سلائیڈنگ اور فلیش فلڈ سے ہوئیں ۔
