ICC T20 World Cup کے سپر 8 مرحلے میں انگلینڈ نے سنسنی خیز مقابلے کے بعد پاکستان کو 2 وکٹوں سے شکست دے کر سیمی فائنل کیلئے کوالیفائی کر لیا۔
پالی کیلے میں کھیلے گئے میچ میں پاکستان کے کپتان سلمان آغا نے ٹاس جیت کر پہلے بیٹنگ کا فیصلہ کیا۔ پاکستان نے مقررہ 20 اوورز میں 9 وکٹوں کے نقصان پر 164 رنز اسکور کیے۔
پاکستان کی جانب سے صاحبزادہ فرحان نے عمدہ بیٹنگ کا مظاہرہ کرتے ہوئے 45 گیندوں پر 63 رنز بنائے۔ بابر اعظم اور فخر زمان نے 25، 25 رنز اسکور کیے جبکہ شاداب خان 23 رنز بنا کر آؤٹ ہوئے۔ دیگر بلے باز خاطر خواہ کارکردگی دکھانے میں ناکام رہے۔
انگلینڈ کی جانب سے لیام ڈاؤسن نے 3 جبکہ جیمی اوورٹن اور جوفرا آرچر نے 2، 2 وکٹیں حاصل کیں۔
جواب میں انگلینڈ کی ٹیم نے ہدف آخری اوور میں 8 وکٹوں کے نقصان پر حاصل کر لیا۔ انگلینڈ کی پہلی وکٹ صفر پر گری جب فل سالٹ پہلی ہی گیند پر شاہین آفریدی کا شکار بنے۔ جوز بٹلر بھی صرف 2 رنز بنا کر پویلین لوٹ گئے۔
کپتان Harry Brook نے ذمہ دارانہ اور جارحانہ بیٹنگ کا مظاہرہ کرتے ہوئے 51 گیندوں پر شاندار 100 رنز اسکور کیے اور اپنی ٹیم کو فتح دلائی۔ ول جیکس نے 28 رنز کی اہم اننگز کھیلی۔
پاکستان کی جانب سے شاہین آفریدی نے 4 جبکہ محمد نواز اور عثمان طارق نے 2، 2 وکٹیں حاصل کیں۔
اس کامیابی کے ساتھ انگلینڈ سیمی فائنل میں پہنچنے والی پہلی ٹیم بن گئی۔ یاد رہے کہ سپر 8 مرحلے میں پاکستان کا نیوزی لینڈ کے خلاف میچ بارش کی وجہ سے منسوخ ہو گیا تھا جبکہ قومی ٹیم اپنا آخری میچ سری لنکا کے خلاف 28 فروری کو کھیلے گی۔
