بلوچستان میں بھارتی حمایت یافتہ دہشتگردوں کے خلاف سیکیورٹی فورسز کی کارروائیاں جاری ہیں، ژوب کے علاقے سمبازہ میں آپریشن کے دوران مزید 3 دہشت گرد ہلاک کردیئے گئے،آئی ایس پی آر کے مطابق 4 روز میں مارے گئے دہشت گردوں کی تعداد 50 ہوگئی ۔
پاک فوج کے شعبہ اطلاعات کی جانب سے جاری بیان کے مطابق بلوچستان کے ضلع ژوب کے علاقے سمبازا میں 7 سے 9 اگست تک سیکیورٹی فورسز کے آپریشن میں 47 خوارج مارے گئے تھے ۔
آئی ایس پی آر کے مطابق سیکیورٹی فورسز نے 10 اور 11 اگست کی درمیانی شب بھی پاک افغان سرحدی علاقہ سمبازا میں آپریشن کیا جس میں فتنۃ الہندوستان کے 3 دہشت گرد مارے گئے ۔
آئی ایس پی آر کا مزید کہنا ہے کہ 4 روز میں مجموعی طورپر 50 دہشت گرد مارے گئے، دہشت گردوں سے اسلحہ، بارود اور دھماکہ خیز مواد برآمد ہوا ۔
آئی ایس پی آر کا کہنا ہے کہ سیکیورٹی فورسز ملک کے دفاع کو محفوظ بنانے کے لیے پرعزم ہیں،سکیورٹی فورسز پاکستان میں امن ،استحکام اور ترقی کو خراب کرنے کی ہر کوشش کو ناکام بنادیں گی ۔
