خیبر پختونخوا کے قبائلی ضلع وسطی کُرم میں چنارک پولیس چیک پوسٹ پر دہشتگردوں کا حملہ ناکام بنا دیا گیا، پولیس کی جوابی کارروائی میں 4 دہشتگرد ہلاک ہوگئے، دہشتگردوں کیساتھ فائرنگ کے تبادلے میں 2 پولیس اہلکار شہید اور 6 زخمی ہو گئے ۔
ضلعی پولیس آفیسر کرم کے مطابق دہشتگردوں کی جانب سے پولیس کی چیک پوسٹ پر حملہ کیا گیا ، جسے پولیس کے جوانوں نے ناکام بنادیا ۔
ڈی پی او کے مطابق جوابی کارروائی میں 4 دہشت گرد ہلاک اور 6 زخمی ہوگئے جبکہ فائرنگ کے تبادلے میں پولیس کے 2 جوانوں نے بھی جامِ شہادت نوش کیا ۔
دوسری جانب مقامی ذرائع نے بتایا کہ دہشتگردوں نے چنارک تھانے کی چیک پوسٹ نذر آتش کر دی، اس دوران دہشتگردوں اور پولیس کے درمیان فائرنگ کا تبادلہ کئی گھنٹے جاری رہا ۔
ڈی پی او کُرم نے مزید بتایا کہ علاقے میں پولیس کی مزید نفری روانہ کی گئی جس نے تین گھنٹے مسلسل دلیری سے مقابلہ کیا ۔
دوسری جانب وزیر داخلہ محسن نقوی نے 4 دہشت گردوں کو اپنے انجام تک پہنچانے پر پولیس کی پیشہ ورانہ صلاحیتوں کو سراہتے ہوئےکہا کہ بہادر پولیس اہلکاروں نے بروقت کارروائی کرکے فتنہ الخوارج کے ناپاک عزائم کو ناکام بنایا ۔
وفاقی وزیر داخلہ نے دہشت گردوں کے خلاف بہادری سے لڑتے ہوئے جامِ شہادت نوش کرنے والے 2 پولیس اہلکاروں کو خراج عقیدت پیش کیا اور لواحقین سے دلی ہمدردی و اظہار تعزیت کیا ۔
