وادیِ سوات میں سیاحت کی پہچان سمجھے جانے والے سرینا ہوٹل نے چار دہائیوں سے زائد عرصے بعد اپنے دروازے بند کر دیے ہیں، اعلامیے میں بتایا گیا کہ نئے سال پر یک جنوری سے سوات سرینا ہوٹل کی سرگرمیاں باقاعدہ طور پر ختم کر دی گئی ہیں، جس کے ساتھ ہی وادی کی سیاحتی تاریخ کا ایک اہم باب بند ہو گیا ہے ۔
سوات( عدنان باچا) اعلامیے میں سرینا انتظامیہ نے پاکستان بالخصوص سوات میں سیاحت کے فروغ کے لیے تعاون کرنے والے تمام اداروں، مقامی انتظامیہ، ملازمین اور سیاحوں کا شکریہ ادا کیا ہے ۔
بیان میں کہا گیا کہ اگرچہ سوات میں سرینا کا سفر اختتام پذیر ہو چکا ہے، تاہم ایشیا اور افریقہ میں موجود سرینا کے 33 ہوٹلز میں مہمانوں کے لیے دروازے ہمیشہ کھلے رہیں گے ۔
قدرتی حسن اور تاریخی وقار کا امتزاج: ۔
سیدو شریف کے سرسبز و شاداب علاقے میں واقع سرینا ہوٹل صرف ایک رہائشی مقام نہیں بلکہ سوات کی شناخت کا حصہ رہا ہے، بلند و بالا درختوں، پرسکون ماحول اور روایتی طرزِ تعمیر نے اسے ملکی و غیر ملکی سیاحوں کے لیے خاص کشش کا مرکز بنائے رکھا، یہ ہوٹل سوات میں معیاری سیاحت کے تصور کی علامت سمجھا جاتا تھا ۔
ایک عمارت، کئی ادوار: ۔
سرینا ہوٹل کے احاطے میں موجود تاریخی عمارت ’’وزیر ہاؤس‘‘ کی بنیاد 1936 میں رکھی گئی تھی، ابتدا میں یہ ریاستِ سوات کے وزیر کا دفتر تھا، بعد ازاں اسے سرکاری مہمان خانہ قرار دیا گیا، اسی عمارت نے وہ دور بھی دیکھا جب برطانیہ کی ملکہ الزبتھ دوم اور ڈیوک آف ایڈنبرا سوات کے دورے پر یہاں مقیم رہے ۔
1961 میں ہوٹل کی 44 کنال سے زائد اراضی پر ایک نیا بلاک تعمیر کیا گیا، جبکہ 2014 میں تاریخی وزیر ہاؤس کو باقاعدہ طور پر ہوٹل کا حصہ بنا دیا گیا، جو آج بھی اپنی اصل حالت میں موجود ہے ۔
لیز کا معاملہ اور انتظامی اختلافات: ۔
یہ عمارت 1985 تک ’’سوات ہوٹل‘‘ کے نام سے جانی جاتی رہی، جس کے بعد اسے سرینا ہوٹلز نے 30 سالہ لیز پر حاصل کیا۔ یہ معاہدہ 2015 میں ختم ہو گیا تھا، تاہم بعد ازاں عارضی توسیع دی گئی، اب لیز کی مدت مکمل طور پر ختم ہونے کے بعد سرینا انتظامیہ نے مزید توسیع نہ لینے کا فیصلہ کیا ۔
محکمہ سیاحت خیبر پختونخوا کے ڈائریکٹر جنرل حبیب عارف کے مطابق حکومت اور سرینا کے درمیان بنیادی اختلاف لیز کی شرائط اور کرایے پر تھا ۔
ان کا کہنا ہے کہ موجودہ حالات میں ہوٹل کا ماہانہ کرایہ چار سے پانچ کروڑ روپے بنتا ہے، جبکہ سرینا انتظامیہ پرانے نرخوں پر لیز جاری رکھنا چاہتی تھی، حکومت اس معاملے میں مختلف عدالتی مقدمات بھی اپنے حق میں جیت چکی ہے ۔
مستقبل کا لائحہ عمل: ۔
محکمہ سیاحت کے مطابق ہوٹل کو بغیر لیز چلانے کی کوئی گنجائش نہیں، اس لیے اب اس عمارت کے لیے دوبارہ ٹینڈر جاری کیا جائے گا۔ حبیب عارف کے مطابق 46 کنال پر پھیلے اس ہوٹل سے حکومت سالانہ 84 سے 85 کروڑ روپے تک آمدنی حاصل کر سکتی ہے، جس سے صوبائی خزانے کو خاطر خواہ فائدہ پہنچنے کی توقع ہے ۔
سوات سرینا ہوٹل کی بندش نہ صرف ایک کاروباری فیصلہ ہے بلکہ یہ سوات کی سیاحتی تاریخ میں ایک اہم موڑ بھی ثابت ہو رہی ہے، اب سب کی نظریں اس بات پر ہیں کہ یہ تاریخی عمارت مستقبل میں کس شکل میں وادی سوات کی سیاحت کا حصہ بنتی ہے ۔
