تھانہ میلوارڈ کے علاقہ اکاخیل امن تالاب میں نامعلوم افراد کی فائرنگ سے شہید ہونے والے پولیس کانسٹیبل توصیف خان کی نماز جنازہ پولیس لائن خیبر شاکس میں ادا کردی گئی اور سرکاری اعزاز کے ساتھ سپردِ خاک کردیا گیا ۔
خیبر: شہید پولیس اہلکار کی نماز جنازہ میں سی سی پی پشاور ڈاکٹر میاں سعید احمد ، ڈی پی او خیبر وقار احمد، ایس پی انویسٹیگیشن، ایس پی باڑہ سرکل، ڈی ایس پی ہیڈکوارٹر، سرکل افسران، شہید کے لواحقین سمیت پولیس افسران و اہلکاروں نے کثیر تعداد میں شرکت کی ۔
اس موقع پر پولیس کے چاق و چوبند دستے نے شہید کے جسدِ خاکی کو سلامی پیش کی، جبکہ افسران نے شہید کے جسد خاکی پر گلدستے رکھے اور جاں بحق اہلکار کے بلند درجات کے لیے خصوصی دعا کی گئی ۔
سی سی پی پشاور ڈاکٹر میاں سعید احمد نے شہید توصیف خان کے لواحقین سے تعزیت کی اور ان کی جرات، بہادری اور فرض شناسی کو زبردست الفاظ میں خراجِ تحسین پیش کرتے ہوئے کہا کہ شہید توصیف خان ایک نڈر، ایماندار اور بہادر پولیس اہلکار تھے ۔
سی سی پی او پشاور ڈاکٹر میاں سعید نے لواحقین کو یقین دلایا کہ محکمہ پولیس شہداء کے خاندانوں کے ساتھ ہمیشہ کھڑا رہے گا، اور شہید توصیف خان کا خون رائیگاں نہیں جانے دیا جائے گا ۔
