پشاور (ویب ڈیسک) پشاور سے تعلق رکھنے والی سینئر صحافی انیلا شاہین برین ہیمرج کے باعث جمعرات کے روز انتقال کر گئیں۔ ان کے اچانک انتقال کی خبر سے صحافتی حلقوں میں گہرے رنج و غم کی لہر دوڑ گئی۔
پشاور پریس کلب کے صدر کے مطابق مرحومہ کی نمازِ جنازہ آج سہ پہر 3 بجے چمکنی میں ان کے آبائی گاؤں عزیز آباد، انقلاب روڈ پر ادا کی جائے گی۔
پشاور پریس کلب کی کابینہ اور گورننگ باڈی نے انیلا شاہین کے انتقال پر گہرے دکھ اور افسوس کا اظہار کیا۔ صدر پشاور پریس کلب ایم ریاض نے اپنے تعزیتی بیان میں کہا کہ انیلا شاہین ایک نڈر، بااصول اور پیشہ ور صحافی تھیں جنہوں نے صحافت کے میدان میں نمایاں خدمات انجام دیں۔
وہ صحافیوں کے حقوق اور مفادات کے لیے بھی سرگرم رہیں اور خیبر یونین آف جرنلسٹس کی جنرل سیکریٹری منتخب ہوئیں، جو خیبر پختونخوا میں ورکنگ جرنلسٹس کی نمائندہ تنظیم ہے۔
ان کے انتقال سے پشاور کی صحافتی برادری ایک مخلص اور فعال آواز سے محروم ہو گئی ہے۔
