صدر ٹرمپ نے اپنے تازہ ویڈیو خطاب میں ایران کے خلاف بڑے پیمانے پر فوجی کارروائیوں کا دعویٰ کرتے ہوئے کہا ہے کہ امریکی افواج نے پاسدارانِ انقلاب کی تنصیبات، ایرانی فضائی دفاعی نظام اور اہم عسکری اہداف کو نشانہ بنایا ہے۔
ٹرمپ کے مطابق کارروائی کے دوران 9 بحری جہازوں اور ایرانی بحریہ کی ایک اہم عمارت کو بھی تباہ کیا گیا۔ انہوں نے دعویٰ کیا کہ امریکا نے ایران کی 48 اہم شخصیات کو ہلاک کر دیا ہے اور ایرانی ملٹری کمان کا ڈھانچہ مکمل طور پر ختم ہو چکا ہے۔
امریکی صدر نے کہا کہ ایران میں بہت سے لوگ ہتھیار ڈالنے کے خواہشمند ہیں۔ انہوں نے واضح کیا کہ اگر پاسدارانِ انقلاب، ایرانی فوج اور پولیس ہتھیار ڈال دیں تو انہیں استثنا دیا جا سکتا ہے، بصورت دیگر انہیں موت کا سامنا کرنا ہوگا۔
ٹرمپ نے مزید کہا کہ مقررہ اہداف کے حصول تک فوجی آپریشن جاری رہے گا۔ انہوں نے خبردار کیا کہ اس دوران مزید امریکیوں کی ہلاکتوں کا امکان موجود ہے، تاہم امریکا اپنے شہریوں کی جانوں کا بدلہ ضرور لے گا۔
اپنے خطاب کے اختتام پر امریکی صدر نے کہا کہ امریکا ایرانی عوام کے ساتھ کھڑا ہے اور ایرانی شہری اس موقع سے فائدہ اٹھاتے ہوئے اپنے ملک کو واپس لینے کی کوشش کریں۔
