سیکیورٹی ذرائع کے مطابق افغان عبوری حکومت کی جارحیت کے خلاف پاک فوج کی جوابی کارروائیاں جاری ہیں۔ ذرائع کا کہنا ہے کہ صوبہ ننگرہار کے شہر جلال آباد میں ڈرونز اسٹوریج اور اسلحہ ڈپو کو تباہ کر دیا گیا ہے، جبکہ خوگیانی ضلع میں قائم ایک فوجی اڈہ بھی نشانہ بنا کر تباہ کر دیا گیا۔
سیکیورٹی ذرائع کے مطابق کارروائیاں حالیہ سرحدی کشیدگی کے تناظر میں کی جا رہی ہیں اور مختلف مقامات پر اہداف کو کامیابی سے نشانہ بنایا گیا ہے۔
دوسری جانب وفاقی وزیر اطلاعات عطا تارڑ نے 3 مارچ تک پاکستان اور افغان طالبان کے درمیان جھڑپوں کے اعداد و شمار جاری کرتے ہوئے بتایا کہ خیبرپختونخوا اور بلوچستان میں 29 مقامات پر طالبان کے حملے ناکام بنائے گئے۔
انہوں نے کہا کہ جوابی کارروائیوں کے دوران خیبرپختونخوا میں 40 جبکہ بلوچستان میں 27 افغان طالبان ہلاک ہوئے۔ وزیر اطلاعات کے مطابق ملک کے دفاع کے دوران بلوچستان میں ایف سی کا ایک اہلکار شہید جبکہ پانچ اہلکار زخمی ہوئے۔
حکام کا کہنا ہے کہ سرحدی علاقوں میں سیکیورٹی ہائی الرٹ ہے اور کسی بھی قسم کی جارحیت کا بھرپور جواب دیا جا رہا ہے۔
