احتساب عدالت پشاور نے اپر کوہستان مالیاتی اسکینڈل میں ملوث ملزم سرن زیب کی پلی بارگین کی درخواست منظور کر لی۔ عدالت نے قومی احتساب بیورو (نیب) خیبر پختونخوا کی جانب سے منظور کی گئی پلی بارگین کی درخواست کی توثیق بھی کر دی۔
احتساب عدالت کے جج محمد ظفر نے اپنے فیصلے میں کہا کہ نیب آرڈیننس کے تحت ملزم کی درخواست نیب نے منظور کی ہے، لہٰذا عدالت اس کی توثیق کرتی ہے۔
عدالتی فیصلے کے مطابق اپر کوہستان مالیاتی اسکینڈل میں ملزم سرن زیب کے اکاؤنٹ میں تین کروڑ اسی لاکھ روپے کی ٹرانزیکشن ہوئی تھی۔ گرفتار ملزم نے اپنی مرضی سے پلی بارگین کی درخواست دی اور مبینہ طور پر خرد برد کی گئی رقم قومی خزانے میں رضاکارانہ طور پر جمع کرانے کی پیشکش کی۔
فیصلے میں مزید کہا گیا کہ ملزم سرن زیب جوڈیشل ریمانڈ پر تھا اور اس کا تعلق قاضی کوٹ، مانسہرہ سے ہے۔ پلی بارگین کی درخواست منظور ہونے کے بعد عدالت نے ملزم کی رہائی کے احکامات بھی جاری کر دیے۔
