پشاور (خصوصی رپورٹر) رکن زونل رویت ہلال کمیٹی اور ممتاز اسلامی اسکالر پروفیسر حافظ عبدالغفور نے کہا ہے کہ معاشرے میں بے شمار بیوائیں، یتیم اور لاچار افراد موجود ہیں جو موجودہ نفسانفسی کے دور میں انتہائی مشکلات کے ساتھ اپنی زندگی گزار رہے ہیں اور اکثر ان کا کوئی پرسان حال دکھائی نہیں دیتا۔
انہوں نے یہ بات اخبار خیبر سے ملاقات کے دوران کہی۔ ان کا کہنا تھا کہ اگر معاشرے کا سنجیدگی سے جائزہ لیا جائے تو معلوم ہوتا ہے کہ بہت سے مستحق افراد بنیادی ضروریات کے لیے بھی مشکلات کا شکار ہیں۔
پروفیسر حافظ عبدالغفور نے کہا کہ ایک جانب خیبر ٹیلی ویژن نیٹ ورک ماہ رمضان کی برکتوں اور اہمیت سے لاکھوں ناظرین کو آگاہ کر رہا ہے، تو دوسری جانب اس کی فلاحی تنظیم خودمختار ساوی مستحق افراد کی مدد اور داد رسی میں قابلِ قدر کردار ادا کر رہی ہے۔
انہوں نے کہا کہ خودمختار ساوی کی جانب سے ضرورت مند افراد کی جس احسن انداز میں مدد کی جا رہی ہے وہ نہ صرف قابلِ تحسین ہے بلکہ معاشرے کے دیگر اداروں اور افراد کے لیے بھی ایک مثال ہے۔
