ملک بھر میں 16 اپریل سے بارشوں کا نیا سلسلہ شروع ہونے کا امکان ہے، جس کے تحت مختلف علاقوں میں تیز ہواؤں، گرج چمک اور ژالہ باری کی پیشگوئی کی گئی ہے۔
محکمہ موسمیات کے مطابق 16 سے 19 اپریل کے دوران اسلام آباد، مری اور گلیات میں موسلادھار بارش متوقع ہے، جبکہ گلگت بلتستان اور کشمیر کے بیشتر اضلاع میں بھی تیز ہواؤں اور گرج چمک کے ساتھ بارش کا امکان ہے۔
خیبرپختونخوا کے مختلف علاقوں چترال، دیر، سوات، شانگلہ، کوہستان، مانسہرہ اور ایبٹ آباد میں وقفے وقفے سے بارش اور آندھی متوقع ہے۔ پنجاب کے بیشتر اضلاع میں بارش کی پیشگوئی کی گئی ہے جبکہ جنوبی علاقوں میں بعض مقامات پر ژالہ باری بھی ہو سکتی ہے۔ اسی طرح
بلوچستان کے علاقوں کوئٹہ، ژوب، زیارت، بارکھان، شیرانی، قلعہ سیف اللہ اور چمن میں بھی تیز ہواؤں اور گرج چمک کے ساتھ بارش کی توقع ہے، جبکہ سندھ کے سکھر، لاڑکانہ، دادو اور جیکب آباد میں آندھی اور بارش کا امکان ظاہر کیا گیا ہے۔
محکمہ موسمیات نے خبردار کیا ہے کہ تیز ہواؤں، آندھی اور ژالہ باری کے باعث کمزور انفراسٹرکچر، بجلی کے کھمبوں، درختوں اور سولر پینلز کو نقصان پہنچ سکتا ہے۔
