پشاور: گورنر خیبرپختونخوا فیصل کریم کنڈی کی زیرِ صدارت محکمہ اطلاعات کی کارکردگی کا جائزہ اجلاس منعقد ہوا۔
اجلاس میں حکومتی اقدامات اور عوامی فلاحی منصوبوں کی موٴثر تشہیر کی ضرورت پر زور دیا گیا۔
اجلاس میں صوبے کا مثبت تشخص اجاگر کرنے اور جدید ذرائع ابلاغ کے ذریعے منفی پروپیگنڈے کا موٴثر جواب دینے کی ہدایت کی گئی۔
گورنر خیبرپختونخوا کی زیرِ صدارت گورنر ہاوٴس پشاور میں محکمہ اطلاعات و تعلقاتِ عامہ کی کارکردگی کا جائزہ لینے کے لیے اجلاس منعقد ہوا۔
اجلاس میں مشیرِ اطلاعات ثمر ہارون بلور، سیکرٹری اطلاعات ڈاکٹر محمد بختیار خان، ڈائریکٹر جنرل انصار اللہ خلجی اور دیگر متعلقہ افسران نے شرکت کی۔
سیکرٹری اطلاعات ڈاکٹر محمد بختیار خان نے گورنر فیصل کریم کنڈی کو محکمے کے انتظامی ڈھانچے، افرادی قوت، مجموعی کارکردگی اور مختلف شعبوں کے امور پر تفصیلی بریفنگ دی۔
بریفنگ میں پبلک ریلیشنز، ڈائریکٹوریٹ آف کمیونیکیشن، پریس رجسٹرار، ایف ایم ریڈیو اور ڈیجیٹل ڈائریکٹوریٹ کے امور اور کارکردگی سے گورنر کو آگاہ کیا گیا۔
گورنر فیصل کریم کنڈی نے کہا کہ محکمہ اطلاعات صوبے کا مثبت تشخص اجاگر کرنے میں کلیدی کردار ادا کرے۔
حکومتی اقدامات، پالیسیوں اور عوامی فلاح و بہبود کے منصوبوں کو موٴثر انداز میں عوام تک پہنچانا محکمہ اطلاعات کی اہم ذمہ داری ہے۔
گورنر خیبرپختونخوا نے ہدایت کی کہ مشاورتی کونسل کے عوامی مفاد کے اقدامات اور ترقیاتی ترجیحات کو موٴثر ابلاغ کے ذریعے عوام تک پہنچایا جائے۔
فیصل کریم کنڈی نے کہا کہ صوبے کے خلاف پروپیگنڈے کا موٴثر جواب دینے اور مثبت بیانیے کو فروغ دینے کے لیے جدید ذرائع ابلاغ اور ڈیجیٹل پلیٹ فارمز سے بھرپور استفادہ کیا جائے۔
