خیبر پختونخوا کے ضلع ہنگو میں سیکیورٹی فورسز اور دہشتگردوں کے درمیان شدید جھڑپوں کے دوران دہشت گردوں کے جانب سے داغے گئے مارٹر گولے مقامی آبادی پر بھی گرے جس سے 6 شہری شہید اور 13 زخمی ہوگئے،اس دوران کئی دہشتگرد بھی ہلاک ہوگئےاور دہشت گرد اپنے ساتھیوں کی متعدد لاشیں لے کر فرار ہوگئے ۔
ہنگو میں پولیس، سی ٹی ڈی و سیکورٹی فورسز نے مشترکہ کامیاب کارروائیاں کرتے ہوئے فتنۃ الخوارج کے 100 سے زائد دہشت گردوں کی ضلع ہنگو میں دراندازی کی کوشش ناکام بنائی، اس دوران کئی علاقے دہشتگردوں سے کلیئر کردیئے گئے ۔
پولیس حکام نے بتایا کہ پیر کے روز سے شروع ہونے والی جھڑپوں میں دہشت گردوں کو بھاری نقصان کی اطلاعات ہیں، دہشتگرد ضلع اورکزئی کے پہاڑوں سے ہنگو کے علاقوں زرگری، شناوری اور نریاب میں داخلے کی کوشش کر رہے تھے، کہا س دوران سیکیورٹی نے بروقت آپریشن شروع کیا ۔
دہشت گردوں نے مختلف سرحدی پوسٹس کا محاصرہ کرنے کی بھی کوشش کی جسے ضلعی پولیس، سی ٹی ڈی، ایف سی اور پاک فوج نے بروقت کارروائی سے ناکام بنا دیا ۔
سہ روزہ آپریشن کے دوران فتنۃ الخوارج کے دہشتگردوں اور پولیس و سیکورٹی فورسز کے درمیان شدید جھڑپیں ہوئیں، جن میں دہشتگردوں کے فائر کیے مارٹر گولے مقامی آبادی پر بھی گرے، جس سے 6 شہری شہید اور 13 زخمی ہوئے ۔
مقامی لوگوں کے مطابق دہشت گردوں کو زبردست نقصان پہنچا اور وہ اپنے ہلاک ساتھیوں کی لاشیں اور زخمیوں کو اٹھاتے ہوئے فرار ہوئے۔ کامیاب آپریشن کے نتیجے میں عوامی پراپرٹی، اسکولوں اور پہاڑی علاقے کو کلئیر کروا لیا گیا ہے ۔
