اسلام آباد: وفاقی وزیر اطلاعات و نشریات عطاء اللہ تارڑ نے کہا ہے کہ پاکستان امن چاہتا ہے.
وفاقی وزیر کا کہنا تھا کہ اگر جنگ مسلط کی گئی تو بھرپور اور منہ توڑ جواب دیا جائے گا۔
پاکستان ہمیشہ سے یہ موقف رکھتا آیا ہے کہ امن کو کمزوری نہ سمجھا جائے۔
وہ پریس ایسوسی ایشن آف سپریم کورٹ کے زیر اہتمام معرکہ حق کی فتح کا ایک سال مکمل ہونے پر منعقدہ تقریب سے خطاب کر رہے تھے۔
عطاء اللہ تارڑ نے کہا کہ معرکہ حق کی اس تقریب میں شرکت باعث اعزاز ہے اور معرکہ حق میں پوری قوم اپنی مسلح افواج کے شانہ بشانہ کھڑی تھی۔
وفاقی وزیر اطلاعات نے کہا کہ گزشتہ برس معرکہ حق کے دوران قومی اسمبلی میں اپنی تقریر میں واضح کیا تھا کہ آج ہم سیاسی تقسیم سے مبرا ہیں۔
اب دشمن کی آنکھوں میں آنکھیں ڈال کر جواب دینے کا وقت ہے۔
انہوں نے کہا کہ کامیابی قومی اتحاد و اتفاق سے ہی ملتی ہے۔
عطاء اللہ تارڑ نے کہا کہ رافیل طیارے گرنے کے ساتھ بھارت کا غرور بھی خاک میں مل گیا۔
جب کہ پاک فضائیہ اور ایئر ڈیفنس سسٹم نے عالمی سطح پر اپنی صلاحیتوں کا لوہا منوایا۔
انہوں نے کہا کہ وزیراعظم شہباز شریف کے وژن اور فیلڈ مارشل سید عاصم منیر کی جرات، بہادری اور موثر جنگی حکمت عملی کے باعث پاکستان فتح سے ہمکنار ہوا۔
