اقوامِ متحدہ کے ادارہ برائے مہاجرین (یو این ایچ سی آر) نے کہا ہے کہ افغانستان واپس آنے والے 15 لاکھ افغان مہاجرین کو قانونی دستاویزات اور شناختی سہولیات فراہم کرنے کے لیے کام جاری ہے۔
یو این ایچ سی آر کے نمائندے عرفات جمال نے کابل میں ایک پریس کانفرنس سے خطاب کرتے ہوئے کہا کہ آئندہ تین برسوں کے دوران ان 15 لاکھ افغان شہریوں کو قانونی دستاویزات اور شناختی کارڈز کے حصول میں مدد دی جائے گی جو حالیہ عرصے میں اپنے وطن واپس لوٹے ہیں۔
انہوں نے کہا کہ انسانی امداد کے ساتھ شناخت کا مسئلہ بھی انتہائی اہم ہے، کیونکہ قانونی دستاویزات کی بدولت واپس آنے والے مہاجرین کو روزگار، تعلیم اور دیگر بنیادی سہولیات تک رسائی حاصل کرنے میں آسانی ہوگی۔
عرفات جمال کے مطابق رواں سال اب تک ساڑھے سات لاکھ افغان مہاجرین وطن واپس آ چکے ہیں، جبکہ 2023 سے اب تک پاکستان اور ایران سے مجموعی طور پر 60 لاکھ افراد افغانستان لوٹ چکے ہیں۔
انہوں نے مزید کہا کہ افغانستان اس وقت بڑے پیمانے پر مہاجرین کی واپسی کا بوجھ برداشت کر رہا ہے، لہٰذا واپس آنے والے افغانوں کی مدد کے لیے عالمی برادری کی جانب سے مزید تعاون اور امداد کی اشد ضرورت ہے۔
