وفاقی وزیرداخلہ محسن نقوی نے جے یو آئی کو آڑے ہاتھوں لیتے ہوئے مولانا فضل الرحمان کو سخت تنقید کا نشانہ بنایا ہے،سینیٹ اجلاس سے خطاب میں انہوں نے کہا کہ ریاست مخالف بیانات سے مولانا کی عزت نہیں رہی،اب ان کو ریاست میں نوکری نہیں ملے گی، ان کے لیے ریاست اس دن تک ماں ہوتی ہے جب تک مال ملے، جب حکومت میں حصہ نہ ملے تو ریاست پر تھوک دو ۔
اسلام آباد: سینیٹ میں اظہار خیال کرتے ہوئے محسن نقوی نےکہا کہ ہمارا دورہ ایران دفاعی معاہدے سے متعلق نہیں تھا،کل مولانا فضل الرحمان نے غلط کہا کہ ہم دفاعی معاہدے کے لیے ایران گئے تھے، موجودہ بحران سنبھالنے تہران گئے تھے، میں شوق سے نہیں جاتا، مجھے وزیراعظم نے ٹاسک دیا ہوا ہے جس وجہ سے جاتا ہوں ۔
ان کا کہنا تھا کہ میرے اوپر جے یو آئی کافی دن سے بحث کر رہی تھی، ذاتی طور پر مولانا فضل الرحمان کا احترام کرتا تھا،کل انہوں نے جب کہا کہ میں ریاست پر تھوکتا ہوں، انہوں نے احترام کی گنجائش نہیں چھوڑی،کچھ چیزیں کسی سیاستدان کو زیب نہیں دیتیں ۔
محسن نقوی نےکہا کہ اب آپ کو ریاست سے نوکری اور پیسے نہیں ملنے، جے یوآئی کے سینیٹر کامران مرتضیٰ کے احتجاج پر محسن نقوی نے کہا کامران صاحب آپ کو سننا پڑےگا ۔
انہوں نے اسلام کو کاروبار بنا رکھا ہے، یہ ہر اس چیز کے لیے اسلام کو استعمال کرتے جس میں ان کا ذاتی فائدہ ہو، یہی لوگ آکر کہتے تھےگورنر راج لگائیں ہماری جان چھڑائیں ۔
